Cu e introduccion di e sistema automatisa pa procesa permisonan di negoshi a logra un mehoracion grandi den e tempo pa procesa un permiso. A adapta e programa di JOIN na e necesidadnan di e procesonan pa permiso y e personal a ricibi training durante di e preparacion y implementacion di e programa. Tambe digitalisa tur documento den JOIN y asina contribui na uzo di menos papel. Un danki special na Sra. Mary Baarh, hefe di e seccion di permiso pa negoshi, y na tur e trahadornan di e seccion pa nan dedicacion y esfuerso durante e periodo intenso pa por a logra e meta aki.
Actualmente no tin retraso mas y 80% di e permisonan pa negoshi ta cla pa entrega den un tempo entre 3 y 6 siman dependiendo di e tipo di permiso. Camara di Comercio tambe ta colaborando pa nan advies bin mas rapido y asina por finalisa e peticion di permiso cu mas rapides. Semper tin algun peticionan cu pa motibo di falta di informacion di parti di e cliente of pa motibo cu mester pidi conseho na otro instancianan cu e permiso ta tarda mas di e 6 siman.
Nos di Departmanto di Asunto Economico ta haciendo nos maximo esfuerso pa nos clientenan por ricibi nan permiso rapido y den menos di 6 siman. Pa 2017 nos lo sigui introduci mehoracionnan pa sigui reduci e tempo pa duna un permiso di negoshi. Pa mas informacion tocante permisonan di negoshi por bishita nos website www.arubaeconomicaffairs.aw y nos facebook page Departamento di Asunto Economico DEACI