Diabierna merdia Dentista Dr. Hendrik Marsman a bay Ministerio Publico pa entrega un denuncia contra dentista A. Kawaiah Orthodontics pa valsheid in geschrifte y oplichting. Ta asina cu sr. Marsman a bay recherche na Noord pa entrega denuncia y nan no kier tum’e pasobra segun nan DVG mester check e asunto aki.
Sr. Marsman ta di opinion cu tog e tin cu bini Ministerio Publico pasobra esaki ta trata di un denuncia contra un dentisa cu ta traha a base di un papel ilegal como specialista y a base di esey, presentando e documento ey cu no ta dun’e titulo di specialista, tog e ta cobrando salario di specialista cual ta cay bao categoria di oplichting, chicando fondo di AZV cual ta fondo di pueblo [650 mil florin pa aña].
Cinco siman pasa sr. Marsman a bay denuncia e problema caba na DVG cu e meneer aki su diploma, a pidi DVG y Minister pa interveni, hasta minister president a haya copia di e carta. “Awe nos ta cinco siman despues y tur hende ta keda keto keto”, sr. Marsman ta bisa.
E problema dicon ta keda keto ta pasobra segun sr. Marsman, gobierno a haci un blunder masha grandi mes cu e caso aki, aworaki tin tapamento. “Mi ta bin denuncia esey tambe pasobra gobierno no por keda keto y tapa e blunder aki. E ta un cos serio. Imagina bo por ehempel nos compania di Serlimar cu ta tira sushi afo, bo ta haya un director cu nan a haya sa tin diploma falso, nan ta kit’e mesora anto e mester bay corte numa wak su derecho”, sr. Marsman ta bisa.
Akinan e gobierno aki segun sr. Marsman, nan no tin cunes cu salud di hende, lagando un dentista trahando ilegalmente cu no tin e diploma, lag’e keda traha cobra salario y haci manera nada no ta pasando. “Dus un director di compania di sushi bo ta kit’e paso e tin diploma falso, un dokter cu ta presenta diploma falso, cobra un dineral na fondo publico, bo ta lag’e traha”, sr. Marsman ta expresa.