Un cantidad di mucha, cu awe ta hoben of adulto a lanta den un cas unda un mayor tabata alcoholico of uzado di droga. E consecuencia negativo di esaki riba e mucha ta pa bida largo. Muchanan asina tin un risico aumenta pa keda atras den bida y no prospera of progresa. Crece cu mayornan adicto/alcoholico, por pone un mucha den un bida di incertidumbre, chaos y inconsistencia.
Den e famia no tin claridad ki rol cada ken tin, y pensamentonan ilogico ta e norma. Pleito, bringamento, gritamento y violencia ta cos comun pa nan. Muchanan lanta asina, ta sufri di trauma, y lo carga esaki hiba den nan bida di adulto.
Yiunan di adicto nunca sa y nunca ta sigur kico lo pasa cada dia. Mayoria biaha nan bida ta insigur, y instabil. Heridanan mental y emocional profundo ta keda atras cerca yiu di un adicto, y regularmente esaki ta resulta den problemanan emocional y di comportacion pa bida largo.
E AÑANAN DI INFANCIA
Adiccion ta afecta tur hende den e famia. E ambiente instabil ta causa cu e mucha tin cu actua como adulto y tin biaha hasta percura pa e mayor adicto. E infancia practicamente ta wordo horta for di e mucha, e mucha ta isola su mes y ta sconde su sentimentonan. Un mucha cu nunca a siña pa forma un bond di amor na cas, lo tin dificultad pa forma un bond di amor cu otronan despues den bida. Generalmente yiunan di adicto tin amor propio abao, ta sufri di problemanan di desconfianza propio, y nan no ta confia hende masha. Nan por comporta malo na school, y tin dificultad pa anda cu situacionnan social. Yiunan di adicto, ta wordo afecta den 2 forma:
1. Sintomanan externo:
Agresion, kibra regla, comportacion impulsivo, no atento, comportacion desafiante..
2. Sintomanan interno:
Nivel halto di depresion, ansiedad y otro enfermedadnan mental.
Efectonan duradero riba e comportacion como adulto
E trauma cu mayornan adicto ta causa na e yiunan, generalmente lo sali na superficie, ora e persona afecta, forma relacionnan y ora e mes tin cu aplica dinamicanan di educacion. Tin diferente caracteristica di personalidad cerca yiunan di adicto.
Isolacion.
Considerando cu e yiu di un adicto, no sa kico ta comportacion normal, e no sa con pa contesta balansa, regularmente e ta guess con ta e manera corecto pa actua, anda y reacciona den hende. Generalmente nan ta sinti cu nan ta diferente, y ta mira man mes como victima pa hustifica nan comportacion disfuncional.
Comportacion compulsivo
E persona por actua sin pensa, y haci escogencianan sin considera opcionnan. Despues ta gasta hopi energia pa sconde of fix erornan di nan actonan. Como resultado e ta bay rabia cu su mes, bay den confusion, y duda den su mes.
Reaccion exagera
Yiu di adicto tin dificultad cu cambio. Ora algo pasa cu ta fuera di su control, e por reacciona extremadamente emocional y negativo. E no tin e habilidad pa ahusta y pensa riba un resultado positivo. Inconsistencia
Pa falta di consistencia y disciplina, ta dificil pa e yiu di adicto start y caba cu algo. Door di miedo pa faya, nan ta compromete nan mes y na final no por cumpli.
Gañamento
Como cu e yiu di adicto tin dificultad pa deal cu situacionnan social, e tin chens di desvia di e realidad. E ta exagera of gaña cosnan pa wordo acepta.
Busca aprobacion
Como adulto yiu di adicto constantemente ta busca aprobacion, y tin dificultad cu critica. Nan ta responde rabia, of cu manipulacion emocional, p.e. yora, culpa otro of keda sin papia. Hunga e victima Adultonan yiu di adicto, no ta wak cu nan escogencianan ta hunga un rol den nan bida y nan relacionnan. Generalmente nan ta culpa e otro pa nan reaccion of comportacion. Ta dificil pa siña di erornan si e mes no ta wak su erornan.
Desafortunadamente, a pesar cu yiunan di adicto a experiencia efectonan devastador, hopi (no tur), ta desaroya un of otro tipo di adiccion nan mes y asina e ciclo ta ripiti. Adiccion ta un enfermedad cu ta afecta famia y sociedad completo. Ta hopi importante pa reconoce sintomanan di un salud mental pober na tempo, pa evita cu e persona ta haci daño. Si abo of un persona cerca ta reconoce e condicion aki, por tuma contacto cu Spiritz Therapy & Counseling na whatsapp 5688806 of telefon 5880629. Esaki ta un proyecto conhunto entre MasNoticia.com y Spiritz.