Conexion cu otronan ta un aspecto importante pa desaroya un mente sano. Conexion cu otronan ta algo humano y ta necesario.
Kico ta nifica conexcion humano ?
Conexion humano ta e sentimento di ta cerca di un otro, e sentimento di ta pertenece na hende y sinti cu nos tin un relacion di apoyo rond di nos. Conexion ta ora dos of mas hende ta sinti balora, mira y scucha, unda no tin critica of husgamento y na unda un persona por sinti su mes mas fuerte emocionalmente.
Conexionnan social por boost nos animo y ta yuda nos maneha nos emocionnan mihor. Hende como especie a prospera durante añanan door di conecta cu otronan. Sea hende a forma gruponan pa logra cierto metanan, of simplemente a conecta cu otronan pa sinti nan mes comprendi.
Ta e conexion humano aki, a pone e mundo avansa. Ora hende ta haci cosnan hunto, y pone meta, nan ta conecta cu otro y por logra cosnan grandi. Ora hende no por of no ta conecta cu otronan e chens pa logra cosnan grandi ta limita.
Cu yegada di interaccionnan digital, a nota un aumento den soledad, pa motibo cu menos hende ta conecta cu otro fysicamente pa p.e. un combersacion, un koffie etc..
Por nota esaki tambe na lugarnan di trabao, den meetings pero te asta den e temporada di pasco of hacimento di aña, unda nos no ta manda carchinan fysico mas, pero ta escohe pa un carchi digital frieu cu nos ta manda rond den telefon pa nos amistadnan.
Kisas esaki ta un manera facil pa conecta cu otronan pero e no ta e forma mas saludabel pa e mente humano. Ta pa un motibo e especie humano ta wordo yama animalnan social. Simplemente pasobra e ser humano tin necesidad di conecta cu otronan pa sinti acepta y comprendi.
Hende tin mester di conexion cu otro. Falta di coneccion cu otro y falta di interaccion social ta ALIMENTO PA SOLEDAD. En corto, nos mester di conexion humano. Conectando cu otronan riba nivel fysico y emocional, por juda e ser humano eleva su salud en general, su bienestar pero
principalmente esaki lo eleva nos estado di salud mental. Coneccion humano por ta un simpel combersación cu un amistad, tumando koffie, pero e por ta tambe un abrazo ora nos tin basta rato sin wak otro. Tambe e por ta un paseo den mondi unda hendenan cu ta aprecia otro ta comparti un hobby cu nan tin en comun. Conectando cu otro no tur ora ta nifica cu hendenan mester ta papiando cu otro. Ora hende ta comparti tempo cu otro y sinti otro su cercanía y carinjo tambe por ta un experiencia pa conecta. Coneccionnan social ta beneficioso pa e siguiente motibonan.
Coneccion humano fysico ta duna un boost na e salud mental. Coneccion social tin un cantidad di beneficio pa nos salud mental. Por ehempel e ta reduci stress, boost e animo y ta eleva e selfesteem. Ora hende ta sinti cu su presencia ta importante pa un otro, esaki ta hopi beneficioso pa e salud mental.Coneccion social por mehora e calidad di bida di hende. Tin prueba suficiente cu ta mustra cu soledad no ta impacta solamente e salud emocional di hende pero tambe e salud fysico. Falta di coneccion social por ta asocia cu obesidad, malesanan di corazon humamento excesivo.
Un estudio conduci na 2018 pa e American Cancer Institute riba 580.000 adulta a duna como resultado cu isolacion social por contribui na depresion, insomnia, y reduccion cognitivo serca hende. En cambio coneccion social por juda pa duna speranza pa un bida mas largo. Si nos kier
duna di nos banda pa eleva nos salud mental, nos tin cu percura pa conecta mhor cu esnan rond di nos.
Esaki ta un colaboracion di Spiritz Therapy y MasNoticia.com
- Latest
