Den Haag no mag di nenga refugiadonan for di Venezuela
DEN HAAG- A bira tempo pa Hulanda cuminsa brinda proteccion na refugiadonan Venezolano na Corsou.
Falta di cuminda, cuido di salud y un falta di perspectiva pa futuro, a pone cu casi tres miyon persona ya caba a bandona Venezuela. Tur dia Colombia ta ricibi un tercera parti di e massa aki. Un cantidad relativamente chikito, poniendo nan mesun vida na peliger , ta subi botonan chikito pa purba yega e beachnan di Corsou. Algun ta make it, otronan no. Tin biaha nan ta wordo intercepta door di Warda Costa y otro biaha, nan ta hayanan confronta cu e olanan cu ta suta e botonan, te cu esakinan ta bolter. Esunnan cu sobrevivi ta disparce den ilegalidad of ta end up den un centro di detencion cu ya caba a surpasa su capacidad. Den mayoria caso nan ta wordo deporta sin cu nan peticion di asilo wordo trata. Den e centro di detencionnan, muchanan ta wordo separa di nan mayornan, no tin acceso pa yudansa huridico y un cuido basico decente ta no existente. Esaki ta Reino Hulandes anno 2018.
Corsou no ta forma parti di e Tratado di Refugiadonan y no conoce un ley di asilo. Te cu juli 2017, e Organisacion di Refugiadonan di Nacionnan Uni, UNHCR, tabata tuma e peticion pa asilo, pa asina por reposiciona nan na otro caminda. Desde e tempo ey, e Servicio di Imigracion di Corsou ta realisa un prueba. Mirando con lihe e migrantenan aki ta wordo deporta despues di nan yegada, ta trece e veracidad di e prueba aki den duda. Pero hopi Venezolano no ta ni haya chance di entrega un peticion pa asilo, ya cu nan no a haci esaki directamente na nan yegada. UNHCR, cu ta urgi otro paisnan pa brinda proteccion na Venezolanonan, te cu e aña aki, den e prome kwartaal, no a ricibi ni un peticion di asilo for di Servicio di Inmigracion.
RESPONSABILIDAD DI KEN
E comunidad Curasoleño tambe ta haci e pregunta di ken ta responsabel pa cumplimento di e derechonan humando y pa brinda proteccion: Corsou of Reino. Y si e contesta ta Reino, kico esaki lo nifica pa e pais mas grandi di Reino, cu ta Hulanda?
Pa di prome, derecho internacional ta brinda e contesta. Según e derecho internacional consuetudinario, niun pais no mag di manda un refugiado bek na su pais di origen, si nan ta teme pa persecusion. (‘non-refoulement’).
Corsou ta mara na e Tratado Europeo di Derecho Humano, cual a wordo firma door di Reino. E Tratado aki ta prohibi paisnan pa manda personanan bek na unda cu nan lo core riesgo di un trato inhumano (articulo 3), cu lo forsa nan pa un evaluacion pa sa si un posibel regreso ta sigur. Migrantenan por apela den caso cu e evaluacion sali negativo (articulo 13). Articulo 5 ta brinda tambe contra di aresto involuntario y mal condicionnan di detencion.
Funcion di garantia
Statuut di Reino Hulandes ta proporciona informacion riba e division mutuo di responsabilidadnan. Si un di e paisnan demostrablemetne no (por) proteha e derechonan humano, Statuut tin un funcion di garantia (articulo 43.2), cu lo por conducio na un intervencion di gobierno di REino. Y den esaki, Hulanda tin un stem dominante.
Aunke cu Den Haag ta para ariba cu e paisnan mes mester garantisa e derechonan, articulo 3.g di statuut ta determina cu Reino ta e unico responsabel pa e condicionnan general pa e admision y explusion di stranheronan. Amnisty International, Instituto Hulandes pa Derechonan Humano (College voor de Rechten van de Mens) y Defensor di Pueblo (Ombudsman) a vocifera nan critica duramente ariba e tema aki.
Hulanda kier of no, e ta hopi involucra caba den e crisis di refugiadonan.Pa esaki mester considera e relacionnan comercial cu Venezuela y e acuerdo recien di Minister Blok, den lente pa lanta e blokeo comercial y habri fronteranan bek (despues di cual e cantidad di deportacionnan pa Venezuela a aumenta repentinamente), mester pensa tambe riba e papel di Hulanda den e vigilancia di frontera y di Warda Costa den Caribe Hulandes.
E contribucion directo di Hulanda den politica di migracion na COrsou ta limita na un compromiso financiero pa un centro di detencion nobo. Segun Amnisty International, esaki lo contribui ainda mas na e violacionnan di Derechonan Humano, ya cu e detencion lo mester ta un ultimo recuros y un standaard manera ta na Corsou.
Crisis migratorio regional
Por lo tanto, tur e esfuersonan di Hulanda te cu awo tin como obhetivo di proteha y deporta, en bes di ofrece proteccion y fortalece e Derechonan Humano. Hulanda tampoco ta contribui na e solidaridad den e crisis migratorio regional.
E pregunta ta keda e ora, cuanto tempo mas Hulanda, como pais mas grandi di Reino, por keda evadi su responsabilidad den esaki. Casi tur dia refugiadonan Venezolano ta pone nan bida na peliger, pa por yega den Reino Hulandes. Pa despues nan haya nan mes enfrenta cu condicionann inhumano y otro violacionnan di nan derechonan fundamental. Na luga di contribui cu esaki, ta ora pa Hulanda compromete su mes cu e proteccion di derechonan . Hulanda no por sigui core pa e responsabilidad aki.