Dr. Horacio E. Oduber Hospitaal ta den proceso di renobacion y alabes construccion di edificio nobo cual lo bay trece cambio cune. Den e edificio actual Verlos ta situa riba piso 1 y Kraam ta riba piso 5 pero despues cu nan muda y cuminsa duna servicio den e edificio nobo esaki lo bay cambia. “E edificio nobo cu den un futuro cercano lo bay den dje ta traha den e estilo di race track unda cu nos lo bay tin e verloskamer y kraamafdeling hunto riba piso 1”, Zorgmanager di verloskamer y kraamafdeling, sra. Renita Blindeling- Hickinson a remarca.
Un otro cambio grandi pa e departamentonan aki ta cu e cambernan y e piso riba su mes ta hopi mas grandi y tin mas espacio. Otro cambio cu lo mira den futuro cercano pa mama cu ta den espera ta cu e medium care cu actualmente ta riba piso 1, na unda 6 pashent ta hospeda hunto, lo bay bira cambernan di solamente 2 pashent, pues mucho mas privacidad. Pa loke ta e pashent cu ta den High care, kiermen si e pashent tin hopi complicacion den su embaraso, e lo drumi su so y lo tin un nurse dedica cu lo control’e. Un otro cambio ta cu na luga di tin 4 sala di parto, lo bay tin 5 sala di parto den e edificio nobo.
Hospital ta kere firmemente den inverti den ekiponan moderno y pensa den futuro. P’esey tambe a logra modernisa un di e salanan di parto cu un ‘birthing-pool’, unda cu e persona na estado por haya e baby den awa. E manera di duna luz aki ta uno popular mundialmente y na Aruba y HOH ta orguyoso di por bay ofrece e posibilidad aki den futuro cercano.
Un otro cambio cu lo bay tin tambe ta cu den e sala di parto ora cu e mama caba di duna luz, e famia por keda eyden pa e 24 ora cu nan ta eynan na Hospital.
Loke cu e pashent lo bay experiencia den futuro cercano ta cu e cuido pa mama y yiu lo ta uno mas intensivo, unda cu e mama y yiu semper lo ta hunto y e cuido semper lo sosode dilanti di e mama, sra. Blindeling a comenta.
E reto nobo pues pa e edificio ta e espacio mas grandi cu lo bay tin y e binimento di 2 team hunto cu lo mester fungi como uno. Hospital semper ta boga pa brinda un calidad di servicio halto y e diferente cambionan aki ta trece mas siguridad y privacidad pa e pashent.