Soeur Birgit van Erpa a nace dia 4 di November 1924 na Oss, Hulanda. E tabata e yiu di mas chikito di famia van Erp. Soeur Birgit tabata tin un ruman muher y cinco ruman homber di cua tres di nan a bira misionario. Esaki ta caracterisa e famia cu cuater di e shete yiunan a scoge pa un bida religioso. Biba segun e Evangelio di nos Salbador Jesu Cristo tabata nan mandamento y den e mandamento aki sigur sigur soeur Birgit a logra su meta.
Na 1952 soeur Birgit a drenta e Congregacion dje Soeurnan Dominicanessen di Bethanië na Venlo. Na 1958 el a sali cu 6 otro soeur rumbo pa London/Ontario na Canada pa bay traha den un centro pa mucha muhe cu tabata studiando of trahando caba. Na 1960 soeur Birgit a bin cu 5 otro soeur Aruba pa traha na Imeldahof. Pero na 1963 e Congregacion a habri un noviciat nobo na Kenosha, Winsconsin, USA y soeur Birgit a worde nombra ayanan como Priorin y Maestra pa e novicenan. Anto na 1968 soeur Birgit hasta a haya e nacionalidad Mericano y e derecho pa vota. Despues cu e noviciat na Merca a cera na 1970, soeur Birgit a scoge pa bin bek Aruba enbes di repatria pa Hulanda. El a bin biba den e convento di e soeurnan Dominicanessen di Bethanië na Noord y cu alegria y animo el a bay traha atrobe pa e Kinderhuis Imeldahof y pa e Kinderdagverblijf Te Aworo na San Nicolas. Durante e añanan 1970 te 1985 soeur Birgit a funciona como directora di e Kinderhuis Imeldahof. Na 1985 Kinderhuis Imeldahof no cay mas bao dje Stichting Bethanië, pero a bira Fundacion Kinderhuis Imeldahof y laiconan a bin reemplasa e soeurnan.
E Kinderdagverblijf Te Aworo a haya su independencia na 1994. Ambos proceso riba e caminda pa independencia a wordo guia door di soeur Birgit. Despues soeur Birgit a funciona dies aña largo como consehero. Soeur Birgit a haya un Condecoracion Real pa e bon trabao cu el a haci pa e comunidad di Aruba, e tabata Ridder in de Orde van Oranje Nassau.
Soeur Birgit tabata un persona hopi stima na Aruba, no solamente e tabata manera un mama pa e muchanan di Imeldahof, pero tambe e trahadornan y specialmente e otro soeurnan den e convento a stim’e hopi. Fuera di e convento y dje circulo di su Trabao social, soeur Birgit tabatatin hopi amigo, semper el a ricibi tur hende cu un sonrisa. E tabata un persona hopi amabel y cu un sabiduria grandi, el a haci su tareanan na un manera trankil y cu pasenshi y e por a duna bon guia. Dia 9 di Februari 1995 soeur Susanna y soeur Birgit a sali for dje convento na Noord como e ultimonan di e soeurnan. Gobierno di Aruba a tuma e edificio for di e Congregacion. Ya mayoria di e soeurnan a bay bek Hulanda caba, incluso e soeur Arubano Gemma Figaroa. Solamente e soeurnan Magda Semeleer y Enrica Figaroa a keda riba nan isla. Soeur Magda a muda pa Hulanda na 2004 , pero soeur Enrica a keda Aruba te dia cu el a fayece na 2014.
Despues di su despedida di Aruba soeur Birgit a bay biba na e convento di e Congregacion na Thorn, Limburg. Ey banda el a ricibi hopi amigo Arubiano y e encuentronan semper tabata yen di alegria.
Soeur Birgit tabata semper atento, el a contesta cada carta of mail. Riba un edad basta halto el a siña cana riba e caminda electronico y hasta e tabata activo riba Facebook. Semper e tabata asina agradecido pa tur cos cu el a ricibi, hasta si e tabata ta un cos chikito y pa mustra su gratitud semper el a usa e palabranan: “God’s love brings sweet surprises”.
Un persona sumamente bon y un coryfea di Bethanië a muri, y el a laga un luga bashi atras cerca su famia y e soeurnan di Bethanië, pero tambe cerca su amigonan di Aruba. Pero, e bunita recuerdonan di nos soeur Birgit stima lo fortifica tur hende pa carga e perdida.
Te na ultimo soeur Birgit tabata canta su cantica preferi, e ta sona como lo siguinte:
Into Your hands I commend my spirit oh Lord
Into Your hands I commend my heart
For I must die to myself in loving You
Into Your hands I commend my love.
Cu nos Bon Tata na Cielo recompensa soeur Birgit ricamente pa tur su bon obranan.