Play Off final HEINEKEN fast pitch den categoria A-Klas dedica na Minguel Tromp y Emelina “Mamai” Loopstok a continua diaranson ultimo riba veld di Kudawecha. Piratas Bronx Birds ta mustrando solido y a pone Celebrities lomba contra muraya picando ariba 2-0 den e serie final di best out of 5. Manager di Piratas Richard Marrero ta start cu Hussam “Sam” Koolman su number 2 den su staff di rotacion kende ta bay 7 inning completo regalando 5 base por bola pero seyando e victoria pa su ekipo riba su nomber. Manager di Celebrities Esy Kelly a cuminsa cu Genaro Girigorie. Pa Celebrities Hildward Geerman ta drenta releva den di 6 inning mientras Jeremy Geerman ta releva Hildward den di 7 inning pero Genaro Girigory ta resulta e pitcher perdedor. Staff di pitcheo di Celebrities a otorga un total di 13 base mas por bola mas 1 hit by pitch cual sigur a pisa demasiado y a contruibi na e derota. Piratas 12 careda, 7 hit, 1 eror. Celebrities 7 careda, 10 hit, 2 eror. Miho bateadonan pa Piratas ta Franny D’Oleo 4-2, Samuel de la Rosa 3-2, Jeremy Moreno, Jonathan Perez y Pablo Reid tur di 4-1. Pa Celebrities kende porcierto a conecta mas tanto hit durante wega a destaca na plato Hilward Geerman 3-2, Jose Gregory Quandt 2-2, Danny Yarzagaray 4-2, Greg Manuela 1-1, Jean Mark Tromp 2-1, Urvin Paesch 3-1 y Edson den Boef 4-1. Umpirenan cu a dirigi e wega Edward Cannister, Alvaro Barrios y Sergio Laurant por mira atras riba un tremendo actuacion. Fanaticada a biba cu e wega bataso pa bataso y lansamento pa lansamento. Cu un victoria pa Piratas nan lo titula campeon despues di varios aña hungando den final y lo promove pa AA mientras cu un victoria pa Celebreties nan ta extende e serie pa diadomingo merdia 12pm na Kudawecha. Campeonato oficial HEINEKEN di Aruba Softball Bond den su recta final.