Campeonato HEINEKEN fast pitch di Aruba Softball Bond a continua diadomingo riba veld di Monserat den curason di Noord. Den categoria A-Klas e ekiponan tur ta luchando pa un bon posicion pa cu nan clasificacion mientras Piratas ta e unico invicto cu 7 gana y 0 perdi. Manera e muchanan di Esy Kelly a bisa henter siman avisando Richard Marrero cu lo bay tin un sorpresa diadomingo na caminda. Piratas tabata gana comodo 9 pa 3 te den ultimo oportunidad momento cu Celebrities a manera cende nan turbo y a rally formalmente conta Piratas kendenan inicialmente tabata celebrando. Richard Marrero mes ta tuma monticulo over pero a tira demasiado bola unda finalmente Celebrities ta laga Piratas riba tereno 10-9. Celebrities 10 careda, 10 hit, 0 eror. Piratas 9 careda, 11 hit, 3 eror. Jean Carlo Kock kende ta drenta releva Danny Yarzagaray ta resulta pitcher ganado. Richard Merrero kende ta drenta di relevo ta bay cas cu e derota. Mihor bateadornan pa Celebreties ta Jason Albus 2-2, Genaro Girigorie, Lito Quandt di 1-1, Jean Carlo Kock y Greg Manuela di 2-1, Ray Bernabela di 4-2 incluyendo un bataso pafor di parke esta un cuadrangular. Pa Piratas a luci na plato den causa perdi Whascar Perez 3-3, Franny D’ Oleo di 3-2, Pablo Reid 2-1, Hussan Koolman 1-1 y Richard Marrero di 3-1.Den un otro partido importante den A-Klas e barberonan di Final Touch ta derota Blackhawks den un tremendo partido. Final Touch 4 careda, 6 hit, 5 eror. Blackhawks 3 careda, 6 hit, eror. Melvin Chavez kende ta ricibi relevo den di 5 inning di Santiago Gratero ta bira e pitcher ganado. Clay Shipley ta bay cas cu e derota. Mihor bateadornan pa Final Touch ta Samuel Pinendel y Juan Sosa di 1-1. Pa Blackhawks Clay Shipley ta bay di 3-2. Diabierna awor pa 8pm lo tin un solo wega di A-Klas na Kudawecha entre Blackhawks vs Celebrities y dialuna pa 8pm na Flatstone Piratas lo midi forsa contra Blackhawks. Campeonato di Aruba Softball Bond andando a toda maquina.