Riba agenda di Conseho di Minister di Reino di awe diabierna 24 september, tabata tin e punto di agenda di e sosten di likides pa Aruba pa e ultimo 3 lunanan di 2021.
Lamentablemente CAFT a yega na e conclusion cu Aruba no mester haya sosten di likides mas.
Un punto crucial pa yega na e conclusion aki ta e hecho cu Aruba no a logra corta 60 miyon florin den cuido di salud den e aña aki, manera Hulanda ta exigiendo.
Aruba no ta di acuerdo cu esaki, pasobra esaki no ta posibel den un aña di pandemia, pero asina mes Aruba ta logra corta 40 miyon florin si. Pero debi cu esaki no ta 60 miyon en principio lo a nenga Aruba e sosten di likides.
Prome Minister Evelyn Wever-Croes den un reunion cu Secretario di Estado demisionario Raymond Knops e siman aki, a indica cu ta apenas e siman aki e gobierno nobo a huramenta y pues tin mandato pa por actua. Y e Prome Minister di Aruba a pidi tempo na Hulanda pa por atende cu e puntonan cu CAFT ta señala.
A keda palabra cu e peticion pa sosten di likides di Aruba pa e lunanan di oktober, november y december, lo wordo posponi pa e siguiente reunion di Conseho di Minister na fin di october.
“Gobierno di Aruba ta trahando riba e alternativanan pa asina por bin na remarke pa e sosten necesario. E hecho cu ta tarda un luna mas, no ta un problema debi cu e entrada nan di pais Aruba ta mehorando poco poco, pero sigur”, Prome Minister Evelyn Wever-Croes a duna di conoce.
