LOS ANGELES, Merca- E cantante, compositor y actriz Mericano, Demi Lovato, a wordo hospitalisa diamars. Esaki ta pa un supuesto sobredosis di heroína, según medionan local ta informa.
E informacion ta indica cu e artista ta interna den un hospital di Los Angeles, unda el a wordo hiba diamars merdia for di su cas na Hollywood Hills. E cantante a wordo poni bou tratamento y su condicion actual ta desconoci.
Al parecer e cantante lo a yega hospital for di tino, pa cual a uza Narcan, un remedi di emergencia pa contraataca overdosis di narcotica pa rebiba e cantante.
Demi Lovato ta conoci pa su lucha contra e trastorno bipolar, adiccion y e trastorno alimentario. Segun e portal TMZ, e cantante ta lucha tambe contra di drogadiccion y el a pasa seis aña sin cu el uza niun tipo di droga of bebe un gota di alcohol.
Luna pasa, el a lansa un canción titula ‘Sober’, unda e ta afirma cu “ mi no ta sober mas”.
Pa añanan largo, Demi a lucha contra abuso di sustancianan. Na dado momento el a biba den un cas liber di tur tipo di sustancia, despues cu el a sali for di un centro di rehabilitacion.
E tabata liber di droga pa 6 aña, despues di a lucha varios aña contra di su adiccion di cocaina y Oxycontin.
E siman aki e lo mester a sali di gira, pero esaki mas bien lo wordo cancela.