Dementia Café no ta un koffieshop, manera e nomber ta indica. Pero si e tabata un koffieshop unda cada dos luna ta bini hunto pa traha riba e tema di Dementia. E ta un evento organisa pa Cas Marie, situa dilanti di Marinierskazerne na Savaneta.
Esaki tabata prome encuentro di Dementia Café desde cu Pandemia di coronavirus a cuminsa. E cantidad di hendenan cu a acudi ta indica cu tin un necesidad pa informacion riba e malesa di Dementia, tanto cerca famia como profesionalnan di e ramo pa loke ta cuido.
Sabrina Sonensein, Psicologo, cu a papia e anochi aki, a bisa cu ta hopi importante e beneficio di un diagnostico tempran, ya cu pa hopi e por ta un sentencia di morto y pa e famia ta un alivio pa haya sa kico ta pasando cu e ser keri, y comprende miho con pa yuda nan pa nan tin un miho calidad di bida.
Tin mas cu 100 tipo di dementia y Alzheimer ta esun mas comun. Aki na Aruba Centro di Memoria tin registra cu e pashent di mas jong tin 52 aña y esun mas grandi tin 95 aña. Esun di edad jong ta indica cu tin e tendencia aki den famia. Tin hopi factor di riesgo. E no ta discrimina den hende. P’esey ta importante pa famia nota algun problema di memoria pa acerca dokter di cas y splica e situacion. E mester traha un verwijsbrief pa Centro di Memoria, unda cu ta haci e testnan necesario.
Lisette Does, directora di Cas Marie, a expresa di hopi satisfecho cu e cantidad di hendenan a acudi. El a scucha for di esnan presente e necesidad pa mas Cas Marie. Tin hopi hende cu e problema di salud aki, principalmente pa parehanan grandi. Mester bini un forma di ayudo pa nan of por lo menos mester amplia loke ta existi caba.