Demanda di detencion hubenil pa dos menor acusa di asesinato

Na final di luna di juni y ayera Corte di Prome Instancia a trata caso contra dos mucha homber, ambos di 16 aña, acusa di asesinato. Den ambos caso a pidi detencion hubenil pa nan.

E prome caso ta esun cu a tuma luga riba cambio di aña unda cu e homber Rudy Ras a yega Centro Medico cu hinca cu a resulta mortal. E mucha homber LM di 16 aña a wordo deteni. Dia 25 di juni ultimo a trata su caso, porta cera (prensa tampoco por tabata presente).

Debi na su edad, Ministerio Publico a pidi 12 luna di Jeugddetentie, mas Pij Maatregel, locual ta nifica cu e mester bay bou guía di Reclassering. Tambe a pidi pa e paga un parti di e gastonan di entiero. Hues no a dicidi riba e caso aki ainda. E sentencia ta poni pa dia 16 di juli awo.

 

Tratamento di e otro caso a tuma luga diabierna ultimo y e acusado tabata e mucha homber EN di 16 aña. A acus’e di a mata su welo dia 6 di januari. Según por a comprende extra oficialmente, e welo di 77 aña, a ricibi varios hinca. Kico tabata e motibo di e comportacion aki no ta conocí pa motibo cu tratamento di e caso aki tambe tabata porta cera.

Ministerio Publico a exigi 4 aña di jeugddetentie, di cual 1 aña ta condicional, y 2 aña di prueba. Sentencia lo ta dia 20 di juli pa 2’or di merdia.

Hues a dicidi di trata e casonan aki porta cera pa motibo di e edad di e muchanan, e índole di e cas, bienestar di e menornan en bista di e cas, y proteccion di nan bida priva.

 

Comments

comments