Willemstad Curacao: Korte a trata djárason 31 di ougùstùs 2016 un kaso penal kontra 2 polis di warda di polis Otrobanda, polis J.J.A. (45) i T.R.B.C. (31). Nan ta ser sospechá di entre otro maltrato di un sospechoso i uso no-outorisá di outoridat (onbevoegd bevoegdheid aanwenden). Ta kasonan ku a tuma lugá 27 sèptèmber 2015 den bario di Panamá i den un sel na Rio Canario i 10 di òktober 2015 riba kaya públiko. Tur 3 biaha e mesun persona tabata viktima, esta e hòmber S.S.C. (22).
S.S.C. a sufri durante e kasonan di maltrato, leshon na entre otro kara, garganta, skouder i ambos wowo. E maltrato, sigun testigunan den Panama, a tuma luga ku man, moketa, boei i bleki di gas lakrimógeno. E maltrato tabata asina severo ku e viktima mester a bai poliklinika pa kose su herido nan i haña otro tratamentu mediko. Polis A. tabata sospechá S.S.C. di a hòrta 2 tayer di un baiskel. E kaso a sali kompletamente for di man na momentu ku polis A. a presenta den bario di Panama pa atende e denunsia di un señora.
Fiskal di Ministerio Públiko (OM) a akusá e 2 polis di entre otro violensia eksesivo i uso di violensia desproporshonal. E polisnan a violá, sigun Fiskal, artíkulo 2:275, artíkulo 2:276 i artíkulo 2:360 di Kódigo Penal di Kòrsou. Hechosnan serio ku a kousa hopi daño i trouma inesesario na e viktima. Fiskal a hasi un demanda pa J.J.A. di 18 luna prison dinkual 6 luna kondishon, 3 aña proeftijd i 5 aña ku e no por ehekutá su trabou komo polis (ontzetting uit ambt). Pa T.R.B.C. 6 luna prison kondishonal, 3 aña proeftijd, un kastigu di trabou di 240 ora i 3 aña ku e no por eherse trabou komo polis (ontzetting uit ambt).
E viktima a entregá un daño perhuisio di 44.692 florin. Esaki ta pa entre otro kubri un renchi orea i un kadena di oro. Ambos a kibra durante su maltrato. Sobrá di e montante ta pa kubri trouma ku el a sufri.
Wes ta duna sentensia aki 3 siman.