Aruba Airport Authority N.V. (AAA) ta contento di anuncia cu Delta Airlines lo cuminsa cu su di 2 frecuencia semanal entre Minneapolis cu Aruba pa e temporada di winter 2018 -2019. Delta Airlines awor lo opera 2 frecuencia semanal for di MSP – AUA. E segundo buelo ta inicia dia 19 di Februari, 2019 y lo sigui te cu Maart 26, 2019, agregando un 960 cupo adicional pa e temporada di winter. E ruta lo wordo opera pa un avion tipo B737-800 ariba Diamars. Buelonan pa MSP ariba Diasabra lo wordo opera pa un avion tipo B757 iniciando ariba 22 di December, 2018 te cu Maart 30, 2019.
Adicionalmente, Delta su buelo semanal non-stop for di Boston originalmente programa pa winter 2018 – 2019 awor lo wordo opera durante ful aña 2019. E buelo semanal aki for di Boston pa Aruba lo inicia ariba Diasabra 22 di December, 2018 y lo wordo opera pa un avion tipo B737-900 cu un capacidad di 180.
“E noticia aki ta fantastico, cu Delta su decision pa añadi e buelo adicional for di Minneapolis, y awor e buelo durante ful e aña for di Boston, bishitante y localnan lo tin opcionnan adicional di calidad pa biaha pa y for di nos isla”, ta locual AAA su CEO Sr. James Fazio a expresa.