Dialuna anochi na Holiday Beach Corsou, delegadonan di paisnan ruman den reino Hulandes a topa cu otro pa un encuentro deportivo cu lo bay tuma luga e siman aki na hermana isla Corsou. E intercambio deportivo aki a wordo crea specialmente pa hobennan, pero for di ministerionan di husticia di cada pais.
Dos aña pasa, Minister mr. drs. Arthur L. Dowers, a cuminsa cu e proyecto aki na Aruba, cual a hiba e nomber, “futuro ta den bo man”. Un proyecto cu ta hiba e linea di pensamento netamente di, cu un deportista mas, ta un criminal menos y como tal ministerio di husticianan den reino ta participa den e bunita proyecto aki. E disciplinanan deportivo cu e hobennan lo competi den e cuadra aki lo ta, futbol, beisbol y tambe basketball. E paisnan cu ta participando ta Aruba, Corsou, Boneiro, Hulanda y normalmente Sint Maarten tambe, kende e biaha aki lamentabelmente lo no por competi cu nan hobennan, despues di e desaster natural cu e pais a pasa aden.
Durante e prome anochi di introduccion na Holiday Beach, minister di husticia Arthur Dowers (Aruba) a topa cu su colega minister di husticia di Korsow, mr. Quincy Girigorie como tambe representantenan di ministerio di husticia Hulandes y tambe cu miembro di cas real, Su Altez Pieter-Christiaan van Oranje-Nassau, Van Vollenhoven.