Den weekend a sali un delegacion di Aruba pa atende cu reunionnan di Interparlementair Koninkrijksoverleg na Hulanda dianan 14 te cu 16 di Juni. E delegacion a ser lidera door di Presidente di Parlamento, drs. Mervin Wyatt-Ras. Sr. Rene Herde como presidente di e comision di Asuntonan di Reino ta encarga cu presentacion di e temanan hunto cu e diferente miembronan di Parlamento di e diferente fraccionnan. Temanan cu lo ser trata ta Geschillenregeling. Aki lo regla cual instancia/entidad/body lo ta responsabel pa intermedia ora di disputanan en especial huridico. Lo trata e tema tambe di oportunidadnan economico, hubentud y hobennan, tambe salubridad publico. Unda cu pa e dos puntonan di hubentud y salubridad miembronan di Parlamento a yega di skirbi rapport analisando e situacion na Aruba y den Reino. Pa loke ta trata salubridad a base di palabracionnan haci den IPKO minister di Salubridad a organisa e Health Care Conference Aruba (HCCA) na 2015 y e aña aki. A firma 2 MOU entre e paisnan. Un di man ta tocante cooperacion pa loke ta trata malesanan infeccioso y e otro ariba tereno di inspeccion di salubridad. Esaki sigur ta positivo pa IPKO paso e grupo di trabou aki a duna resultadonan concreto. Lo trata tambe pobresa y micro-economia, siguridad y Reino den 2040. Integridad tambe lo ser trata. Presidente di Parlamento ariba e prome dia di reunion lo duna un discurso di apertura. Segun Wyatt-Ras ta di importancia pa por mantene contacto estecho entre partnernan den Reino. Pa ora di bondad pero tambe ora di conflicto por conta cu cooperacion di coleganan den Reino. E presidente ta spera cu e reunionnan lo ta fructifero.