Diahuebs merdia un delegacion den e deporte di taekwondo a sali pa Costa Rica unda nan lo competi den e di nuebe edicion di e Pan American Junior Kyorugi Championship na Costa Rica. E delegacion di Aruba, cu e mayoria atleta di e scolnan Tiger Taekwondo y Brazil Taekwondo Stichting ta cla pa competi den dos competencia mirando cu nan lo participa tambe na e Costa Rica Open. Ambos scol sigur ta wordo considera como dos scol topdi taekwondo na Aruba y ta resalta cada bez cu nan representa Aruba den exterior. Pa un atleta esaki lo sirbi como su ultimo preparacion y competencia prome cu e weganan Sur Americano Hubenil 2017. Aki un luna e atleta di anja hubenil femenino 2016 di Aruba, Chiara Petrocchi lo defende Aruba su nomber na Santiago de Chile. E atletanan lo wordo guia pa e coach di Tiger Taekwondo, Sr. Teofilo Rodriguez.
Ministro di Deporte dr. Alex Schwengle &directiva di Lotto ta masha contento y orguyoso di e forma cu e ta bin ta trahando pa nan atletanan. Esaki ta un muestra cu taekwondo tin plannan serio pa futuro. Nan mes hopi biaha ta recauda fondo sea ta carwash, bbq, ect pa asina yega na e fondo nan necesario pa realisa nan metanan. Sigur un ehempel pa hopi otro deporte na Aruba. E deporte di taekwondo ta uno cu den e ultimo añanan a bira masha popular na Aruba y ta representa nos isla dignamente den exterior, un bon branding pa Aruba. Nos top-atletanan, dirigente y refereenan di taekwondo ta gosa di un bon reputacion na nivel internacional unda cada un di nan ta wordo reconoci pa e bon trabou desplega.
Sigui sostene Lotto, e loteria di Aruba na bienestar di deporte, specialmente nos atletanan hoben.