E dianan 7,8, y 9 di October ta tumando luga e competencia equestre internacional “Inter Curacao” na Parke Hipiko Zapateer na nos hermana isla Corsou. Aruba tambe lo forma parti di e evento internacional aki unda nos lo wordo representa door di diferente amazona y jinete den tur edad. Mester bisa cu e delegacion di Aruba lo consisti di Genesis Pietersz, Zoey Arends, Nina van Romondt, Noelani Figaroa, Willem Werleman, Shayna Werleman y Dwayne Chirino.
Mayornan di nos atletanan lo competi diadomingo 9 di October. Aña pasa Aruba tabata super exitoso den e competencia na Corsou unda nos representantenan a logra bin cas bek cu varios premio den jinete y amazona como tambe den cabay. Ta bon pa menciona cu tur e jinete y amazona a hiba un preparacion debido pa e competencia aki, e animo ta halto mientras e expectativanan pa cu nos atletanan ta sigui crece.
Aruba semper a luci ora a competi internacionalmente den e deporte aki. Nos tin varios titulonan mundial den diferente categoria logra na competencianan renombra. Esaki ta haci cu e admiracion pa nos atletanan ta uno masha grandi y aprecia.
Un danki sigur na Lotto, e Loteria di Aruba pa medio di Comision di Subsidio cu a yuda subsidia e delegacion di OCA pa e competencia di Inter Curacao 2016.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.