E dianan 15, 16 y 17 di december proximo, un delegacion di Gihae Tang Soo Do Studio lo biaha pa e pais di Puerto Rico unda nan lo ta participando na un campeonato yama Arubank. Na banda di e campeonato lo organisa algun tayer den forma di fogeo /campo di entrenamento pa tur esnan presente. Mester bisa cu e campeonato aki lo priminti di bira uno grandi mirando cu varios pais den e region 18 di Centro Americano y Del Caribe lo asisti na dicho campeonato.
Ya confirma lo bay tin Puerto Rico, Costa Rica, Panama, Nicaragua y nos propio delegacion di Aruba. Notabel ta cu e atletanan Joshua Palomino, Gilbert Geerman y Zdyne Everon di Gihea Tang Soo Do Studio participando na e fogeo y campeonato na Puerto Rico ta esnan cu a briya den e campeonato mundial di World Tang Soo Do teni den luna di juli ultimo na e estado di North Carolina. Es mas tur tres atleta ta formando parti di e seleccion di Aruba Tang Soo Do Federation. Hunto cu e atletanan lo biaha BSBN Melissa Noguerra, cu ta entrenador di e atletanan.
Un danki na Lotto, e loteria di Aruba cu pa medio di Comision di Subsidio cu a yuda subsidia e delegacion di Gihae Tang Soo Do Studio pa e campeonato y campo di entrenamento na Puerto Rico.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.