Den e programa “ E strea di Fin di Aña” na Canal 22 conduci pa Sandra Croes a corona nos representante pa e concurso di Teen Universe 2021 pa Aruba y cu lo competi den e competencia aki cu lo tuma lugar na April 2021 na Nicaragua.
Delany mihor conoci como Dello no ta un persona desconoci mirando cu na 2019 e la competi pa Reina Hubenil y ta masha popular pa e nomber Hello Dello.
Delany ta un hoben cu ta den hopi actividadnan social y tambe ta yuda den varios organisacion como voluntario. Un hoben alegre y cla pa enfrenta tur reto den su caminda.
Delany tabata di competi den 2020 pa Miss Teen Aruba International pero door di e pandemia esaki ta imposibel y manera e oportunidad a yega pa e por representa Aruba den exterior y despues di algun deliberacion e contesta pa su participacion tabata uno positivo. Delany ya caba ta tumando su lesnan di Pasarela y tambe diferente otro lesnan di comunicacion y etiket pa asina e ta bon prepara pa e reto aki.
E coronacion a tuma lugar den e programa Strea di Fin di Aña, unda e sjerp a ser poni pa Roberto Avalo di The Salon cu lo ta esun encarga cu Delany su peinado y makiyahe, e la ser corona pa George Winterdaal presidente di GLW Foundation y a ricibi su flor for di man di Nurianne Helder Miss World Aruba 2018 y tambe den comishon di MTAI.
Keda pendiente pa e projectonan di Delany y di awor caba nos ta pidi pa tur hende ban apoya nos candidata den e concurso Teen Universe 2021.
Delany ta bira e di 3 candidata cu GLW Foundation ta manda pa e concurso aki, e prome tabata na 2013 cu Isabella Gonzales cu a keda den e top 12, Na 2018 cu Daniella Pop cu a keda den Top 16 y awor Delany Wever. Nos ta desea Dello di awor caba tur clase di exito.