Nos tur ta custumbra cu ora di haci pago di impuesto di vehiculo pa mita aña, bo ta haya un recibo p’e cu ta menciona e periodo di Januari pa Juli of Juli pa December. DIMP ta introduciendo sistema di pago parcial, y riba e recibo e cliente lo nota cu lo aparece e palabra ‘Deel Betaling’
Ora cu bo paga e ultimo paga di belasting, e palabra ‘Deel Betaling’ no lo aparece mas, esaki a wordo comunica tambe cu Cuerpo Policial pa nan ta na altura na momento di haci control riba caya. Si e recibo ta menciona palabra ‘Deel Betaling’ ta nifica e ora cu e cliente no a caba di paga por lo menos e mita di aña ainda. Esaki ta un cambio cu a wordo introduci aworaki pa esnan cu lo bay paga parcialmente.
Ora cu cliente paga via banco,e ta haya un recibo di banco dus lo mester pidi un recibo di DIMP anto esaki mester pasa Online. Riba e pagina principal di DIMP, tin un categoria yama Digitale Formulieren y ora bo click riba esaki bo ta haya diferente formulario electronico, bo ta scohe: Aanvraag Kwitantie Motorrijtuigenbelasting, via e opcion aki bo ta duna di conoce cu bo a haci pago via banco y cu bo ta pidi bo recibo. DIMP ta ricibi e peticion, procesa esaki y despues manda e recibo na e contribuyente via email, no tin mester di yega personalmente na DIMP pa esaki.
Ta duna recibo solamente ora cumpli cu suma minimo di e pago cual ta algo hopi importante pa tene na cuenta. E contribuyente por scohe pa pidi cada bes cu haci su pago, e por haci peticion Online pa haya e recibo di e pago parcial, of warda te na Januari cu un solo peticion y haya tur tres recibo cu a paga den e luna anterior.
Hopi biaha DIMP ta haya cu cliente ta bisa nan cu a paga belasting via banco, tin comprobante di banco anto si esey caba ta suficiente. Esaki no ta suficiente segun DIMP, pasobra berdad si a paga via banco e tin un comprobante di banco, pero ainda no ta determinante pa bisa cu el a haci un pago di su belasting di 2021. Pasobra tin cliente tin debe di añanan bieu habri, kiermen nan tin debe di 2018, 2019 y hasta 2020. Online nan por a paga impuesto 2021, pero na momento cu DIMP ricibi e pago y wak con su comportacion di pago ta anto ta ripara cu tin debenan bieu habri, DIMP lo procesa e pago riba añanan bieu prome. Kiermen e cliente kisas via banco of Online a pensa cu ta pagando 2021, pero si tin debe habri e proceso di pago lo bay riba e cuentanan habri prome, dus e cliente lo haya recibo riba 2018 of 2019 riba pago cu a caba di haci.