Decisionnan politico di gobierno di AVP a cambia e rumbo di desaroyo di San Nicolas

0
RBC Juli 2018
Funmiles-2018

Lider di fraccion di POR, Marisol Lopez-Tromp durante conferencia di prensa a mustra riba un cantidad di mentira y declaracionnan sin base a wordo presenta durante tratamento di reapertura di e refineria.

E ta comenta cu e tema di refineria a pop-up diripiente, un tema cu no tabata den e programa di gobernacion tampoco. Ora esaki a bin ex Minister di Turismo Otmar Oduber tabata bezig pa cu desaroyo di hotel na San Nicolas.
E idea di bin cu e dos proyectonan aki banda di otro no ta cuadra y no ta algo di awendia mas. “Nos sa cu refineria tabatin su tempo, e tabatin su exito, e tabatin su progreso, pero tempo a sigui y Aruba a scoge pa un otro rumbo. Pero inespera 2 aña pasa gobierno a bin toch cu e idea di un reapertura”.
Marisol Lopez-Tromp ta splica cu dia cu e reunion den Parlamento a tuma luga den Parlamento tocante e acuerdo el a puntra Premier Eman ta con su vision ta pa e refineria aki den su vision di un Aruba sostenibel, un Aruba unda nos medio ambiente ta e parti mas importante.

Respuesta di Eman tabata cu su condicion pa e refineria ta cu mester bin un tubo di gas entre Venezuela y Aruba, pasobra sin esaki no lo tin deal. “E unico tubo cu nos a haya ta un tubo tira na nos, pasobra a resulta cu no ta berdad tur loke nan a bisa. Nos ta 2 aña despues y ningun construccion di ningun tubo”.
Tambe a puntra ex Minister Schwengle riba e efecto di e gasnan di e refineria riba salud di hende, a pidie pa contesta no solamente como minister, pero tambe como specialista di pulmon. Su respuesta tabata cu si, cu si lo tin efecto riba salud di hende. P’esey lider di fraccion di POR ta puntra si tin otro standardnan di salud pa hendenan di San Nicolas, algo cu naturalmente no ta logico pe, “standardnan di salud mester conta pa tur hende mesun cos y pa tur area mesun cos”.

Sra. Marisol Lopez-Tromp tambe a mustra e diferente resultado si e proyecto hotelero cu e tempo ey Minister di Turismo Otmar Oduber tabatin pa San Nicolas y cu no a sigui debi na e reapertura di e refineria. “Awe 2 aña despues nos lo tabatin mas turista, mas restaurant, mas embeyecimento di infrastructura, mas caretera, mas comercio…full un otro ambiente compara cu loke nos tin awor aki”.

Igualmente e ta menciona e supuesto entradanan cu lo mester a drenta caha di gobierno door di e refineria. Esey kiermen cu awe tin un buraco den presupuesto di Pais Aruba. Ex minister Bermudez no a ni entrega presupuesto aña pasa, e tabata sa cu tin un buraco gigantesco debi na un promesa cu no a wordo haci realidad.

Lopez-Tromp ta considera e reapertura un decision politico, un gañamento pa gana voto, pa cierto hende gana placa y pa gana tempo. Un decision cu a bin 1 aña prome cu eleccion y e discusion a surgi con esaki ta cuadra cu e idea pa un Aruba sostenibel, di un desaroyo diferente pa San Nicolas, cu kizas lo a bin hotel y hasta tabata wordo construi e tempo ey un Green Corridor di miyones cu lo mester a yega e centro di San Nicolas cu tabata wordo desaroya cu enfoke riba cultura. Lamentablemente awo e Green Corridor, pa cual nos ta bay paga miyones, ta yega na un porta cera!

Comments

comments

C: Heineken
new india