Esaki ta e contesta cu mayoria partidonan politico a ricibi for di president di Conseho Electoral di Aruba, Glenn Thode.
E tabata un sesion cu a tuma luga den oranan di mainta na sede di Conseho Electoral Aruba duate cual a permiti entrada di 2 representante di cada partido politico cu a participa den eleccion.
E mainta aki e representantenan di partido berde AVP, mr. Desiree Croes y dr. Rycond Santos do Nascimento, a haci entrega di 3000 firma pidiendo reconteo, debi na iregularidadnan cu nan ta kere a tuma luga.
Aunke cu e partido berde a haya apoyo di gran mayoria di e otro partidonan presente, e contesta di Thode tabata: Boso por bay Corte. Den señal cu e no ta acepta e obheccion ni ta honra e peticion. Despues el a pasa pa ratifica e cantidad di voto cu cada partido a ricibi den e eleccion di dia 25 di juni, y pero no a menciona esun di votonan individual pa motibo cu ta bay tuma demasiado tempo pa repasa 170 candidato. Pero a bisa cu por mira esakinan riba e website di Censo.
E decision aki no a cay na agrado pa mayoria di e 12 partidonan cu a participa den eleccion. Ricardo Croes di su banda a menciona cu e no ta bay pa si RED a haya mas voto of no pero pa duna e pueblo trankilidad cu tur cos ta bay di un forma transparente.
Lider di MAS, drs. Marisol Lopez Tromp a señal e experiencia cu un candidato di nan partido mes a pasa den dje, unda cu el a vota pa su mes pero a haya cero voto na e urna ey. Y tin mas candidato di otro partido cu a pasa den situacion igual.
Lider di Accion21 a expresa su disgusto pa e forma con Conseho Electoral a trata e sesion y e peticion. E ta un muestra mas pakico un tercera parti di e pueblo a vota pa un cambio, y e ta boga pa tin mas transparencia den tipo di procesonan asina.
AVP, cu ta esun cu a entrega e peticion, di su banda a bisa di lo bay delibera internamente cual lo ta nan proximo paso.