Den cuadro di e maneho di Minister encarga cu Desaroyo Teritorial, Infrastructura y Medio Ambiente, a stipula cu un promedio di 1000 cas mester wordo traha pa aña. Pa di e forma aki cumpli cu e demanda cu tin. Den e 1000 aki tin tambe e 200 cu FCCA mester cubri, pero e resto di 800 nos tincu ofrece e terenonan pa construi e casnan, sr. Errol Sjak – Shie director di DIP a elabora.
Despues di e 2 sesionnan cua otorga tereno cu tabatin e aña aki na April y na Augustus, lo bay tin e tercer sesion dia 4 di December caminda cu un bes mas cu 300 persona lo haya e prome cartanan pa reservacion di tereno cu nan ta bin na remarca p’e pa inica cu e proceso pa por obtene e tereno y construi nan cas. Asina Minister Oduber kier cera e aña cu e cantidad cu el a planifica pa yega na dje pa por cumpli cu e demanda cu tin pa construccion di cas.
Segun sr. Sjak – Shie, ketobay e reto di mas grandi ta e parti financiero. Unabes bo haya un reservacion pa bo haya un tereno, lo bo mester demostra cu di berdad tin un instituto financiero manera banco of fondo di pensioen cu ta dispuesto pa financiabo. Esey ta keda un reto paso no ta semper ta facil pa yega na cumpli cu condicionnan di banco pa cumpli cu e parti financiero.
Tin un categoria di hende cu ta dificil pa nan yega na financiamento, eorey ta traha hunto cu FCCA pa wak si por cumpli cu nan demanda. Pa e otro grupo ta sigui stimulanan pa haci e areglonan debido pa cumpli cu e parti financiero. Mas importante ta pa nan keda cla cu nan banco of fondo di pensioen pa pasa e akte di hypotheek tambe ora cu pasa e akte di tereno, sr. Sjak – Shie a enfatisa.
Aworaki e grupo di 2000 – 2005 lo finalisa, kiermen na December ta cera tur peticion cu tin te aña 2005. Kiermen tur hende cu tin peticion haci di 2006/2007 ta bon pa nan cuminsa prepara, regla nan parti financiero pasobra esey ta e partinan mas importante. Sr. Sjak – Shie ta recomenda e grup aki tambe pa cuminsa mira kico ta deseonan pa construccion di e cas cu nan kier. ‘Nan por cuminsa prepara pasobra nos ta transparente den esey cu manera cu aña bolter e gruponan aki ta na turno’ sr. Sjak – Shie a termina bisando.