Dia 25 di juni proximo pueblo di Aruba lo bolbe urna electoral pa deposita nan voto pa nan representante den Parlamento (y Gobierno). Un tema cu ta toca un y tur y cu ta di suma importancia ta nos medio ambiente. Plannan di maneho tocante medio ambiente ta instrumental pa Aruba, mirando cu esaki tin efectonan profundo riba nos bida y salud. Con ta trata nos medio ambiente ta impacta tambe e economia turistico, cu ta depende di un medio ambiente sano y sostenibel.
E infrastructura di Aruba ta mustra con no a tene cuenta cu nos naturalesa. E efectonan di e maneho di desperdicio a resulta den e problema nacional di Parkietenbos. Con ta para berdaderamente cu proteccion di flora, fauna y bida marino? Con cambio di clima lo afecta Aruba y henter comunidad?
Den e debate lo purba di trece dilanti e diferente retonan di medio ambiente cu Aruba ta enfrenta awendia y retonan cu lo enfrenta den futuro.
Riba e anochi aki cada partido politico lo por trece nan vision, mision y solucionnan riba cada tema padilanti. Asina e pueblo en general por saca afo si nan tin un plan balansa entre desaroyo economico y conservacion y proteccion di medio ambiente.
Aruba su medio ambiente tin balor sumamente importante, nos mes como comunidad mester pone mas atencion y precaucion y tambe responsabilisa nos gobernantenan pa e futuro di nos medio ambiente.
E debate ta organisa door di un grupo di varios persona activo riba e tereno di medio ambiente entre otro e team di Aruba Life Organics, Metabolic Foundation y Zero Waste Aruba. E temanan cu lo ta riba mesa riba e debate aki: ‘energia’, ‘maneho di desperdicio’, ‘cambio di clima’ y por ultimo ‘flora, fauna y bida marino’. Pa mas informacion por subi e pagina di facebook Debate Medio Ambiente.
Na e debate tur protocol di DVG lo ta vigente y lo wordo reenforsa.