Falta apenas cuater dia pa e registracion pa participacion na “Elmar Mural Event” cera. Elmar kier corda tur hoben interesa den participa, y cu no a haya un chens pa entrega nan pintura ainda, cu nan tin te cu dia 20 di September pa haci esaki.
Elmar Mural Event ta e oportunidad pa hobennan expresa nan creatividad y talento pa medio di arte inspira pa e tema “Aruba Sostenibel”.
E competencia nacional di pintura pa hobennan ta dividi den dos categoria di edad, esta entre 6 y 12 aña y entre 13 y 18 aña.
Despues cu e competencia cera riba dia 20 di September un hurado lo scoge e pinturanan ganado basa riba originalidad y con e hoben(nan) a interpreta nan expresion di loke ta haci of por haci di Aruba un isla (mas) sostenibel.
E arte di pinta of crea muralnan ta hopi na moda actualmente internacionalmente, y ta un area di arte cu ta sigui crece rapidamente. E artista local Robert Tromp ta envolvi den e proyecto aki di cerca y lo supervisa e exposicion di e obranan cu lo tuma luga na Elmar Hato, unda cu comunidad por aprecia e talento di e participantenan. Tromp tambe lo duna un workshop tambe na e hobennan pa yuda y inspira nan den e desaroyo di nan talento.
E pinturanan mester tin e formato A4/A3 y por entrega nan na cualkier oficina di NV Elmar, sea na Oranjestad, San Nicolas of Hato. Pa mas informacion y e criterianan pa participa, por bishita e website www.elmar.aw.
Tin premionan atractivo pa e 10 ganadonan, entre otro un Gift Certificate di Maduro Travel. E premiacion lo tuma lugar fin di Septembera aki e hobennan lo ricibi nan premionan y Elmar lo mustra cua di e muralnan lo wordo pinta riba muraya di e compania.