E resultadonan ta aden. E di 5 edicion di De Palm Island su Lionfish Challenge, organisa conhuntamente cu Aruba Reef Care Foundation tabata un exito sin igual. Cu un cantidad record di 32 participante, matando 367 Lionfish cu a pisa un gran total di 125.5 kilo a contribui grandemente pa proteha nos bida marino.
Segun estimacionnan preliminar cu e cantidad di Lionfish elimina aki, a yuda scapa bida di mas di 2 miyon pisca di rifnan di nos isla. Lionfish ta un especie invasivo cu te ainda no tin ningun especie ta controla su poblacion. Como cu e ta rende masha lihe y tin un apetit feroz, nan ta forma un menasa pa nos eco sistema local, door cu nan por come tur otro especie cu ta pas den nan boca.
Sin intervencion di e Lionfish Huntersnan e Lionfish invasivo por tuma over areanan henter, eliminando otro piscanan. Esaki ta un peliger tanto pa nos industria turistico cu kier mira rifnan bunita y diverso, como tambe ta un peliger pa nos piscadonan door cu e lo elimina especienan cu hende gusta come tambe.
Ganadonan di DPI/ARCF Lionfish Challenge 2017
– Na di tres (3) luga a keda Luciano Mazzeo, cu a entrega un total di 14.85 kilo di Lionfish durante e 9 dianan di e torneo.
– E di dos (2) luga a bay pa e dama Kimberly van Loon cu durante su dianan liber di trabou, a sa di captura y entrega 15.65 kilo di Lionfish invasivo.
– Na prome (1) luga y ganado absoluto a resulta di ta Canicio van der Biezen cu a gara y registra 22.25 kilo di Lionfish durante di e campeonato aki.
– Canicio a bay tambe cu e premio pa e Lionfish mas grandi, cu a midi un colosal 45cm, pisando 1.5 kilo.
– E Lionfish di mas chikito gara den e torneo a midi 10.2cm y e premio aki a bay pa Patrick van Brackel.
– Diadomingo 15 di januari durante di e evento final, cual tabata un shore dive for di De Palm Island, tabata Canicio van der Biezen cu a sa di entrega mas Lionfish pa bay cu un premio special pa e dia cu 2.95 kilo di lionfish.
– E dama cu ayera a gara mas Lionfish tabata Nancy Hall cu a entrega 2.3 kilo di Lionfish.
Danki na tur cu a haci e torneo un exito
Un danki special a bay na e boluntarionan, organisadonan y tur participante. Un danki particular a bay na De Palm Island pa ta huesped di e evento. Un danki na tur e patrocinado nan cu a coopera pa realisa e torneo: De Palm Island, Aruba Reef Care Foundation, Gianni’s restaurant, De Palm Tours. Igual cu nos boluntarionan, nos mester aplaudi ciudadanonan corporativo cu ta yuda y sostene naturalesa y NGO’s cu ta traha pa e bon causa di conserva naturalesa di nos isla. Nos a gosa di e torneo, premionan y diberticion, danki. Masha danki.
Pabien na tur participante y Aruba cu e logro di yuda nos bida marino.