Dia 24 di Juni proximo lo bay tin e fiesta di San Juan. Ultimo añanan, Departamento di Cultura a bin ta enfoca riba dos punto esencial di maneho, cu ta encera educacion y formacion riba e tereno di arte y cultura y tambe parti di herencia cultural di Aruba, documenta esaki y si por tambe digitalisa esaki, segun director di departamento di Cultura, sr. Siegried Dumfries.
Anualmente tin e proyecto di Dera Gai, San Juan. Ultimo añanan tabata tin diferente proyecto di scol cu a haci, entre otro a yega di bay cu un maletin scol, cu e artefactonan di San Juan/Dera Gai y asina informa e muchanan di scol primario, con e herencia cultural aki ta wordo celebra.
Aña pasa tambe tabata tin dos aña tras di otro e parti di teatro di Dera Gai/San Juan na Cas di Cultura y esey tabata un exito rotundo pa e scolnan primario. E aña aki, Departamento di Cultura tin un otro forma di trece e herencia cultural pa e scolnan primario.
Importante ta cu e parti di formacion y educacion pa nos muchanan, esaki tin un continuidad. Di e forma aki Departamento di Cultura kier aporta na e herencia cultural inmaterial aki, keda bibo. Pa loke ta trata trece e herencia inmaterial aki pa pueblo, e Comision Celebracion Dianan Nacional (CCDN), ta trece esaki mas cerca di pueblo, por medio di bishita diferente centronan di bario y duna charla encuanto di e herencia cultural inmaterial aki. Lo bay tin diferente charla den diferente bario. Tambe lo bay tin un subsidio chikito pa asina por aporta na e centronan di bario den e diferente districtonan na Aruba pa asina mantene e herencia cultural inmaterial aki bibo.
DCA ta haci su esfuerso pa asina aporta pa mantene e diferente herencianan cultural na Aruba bibo y aporta na e desaroyo aki.