BOSTON, Merca – E ex hungado di Boston Red Sox, David “Big Papi” Ortiz ya caba ta wordo atendi den e Massachusetts General Hospital na Boston despues di a yega den un air ambulance cu a transporta e ex beisbolista desde su natal Republica Dominicana, unda cu el a wordo herida di bala, segun ESPN Sports.
Durante e transmision di wega di Boston Red Sox contra di Rangers dialuna anochi, e cadena di television NESN a mustra un video di e ambulance cu tabata transporta Ortiz yegando hospital rond di 10 or y 30 anochi, local.
“E ta un tremendo persona, e ta un superheroe, tur hende ta stim’e y nos tur ta uni den oracion pe”, e manager di Boston Red Sox, e Portoriqueño Alex Cora.
E agencia AFP a resumi cu Ortiz a wordo herida di bala na Republica Dominicana. Varios version ta indica cu e ex hungado, mei mei di un club nocturno na Santo Domingo , capital di Republica Dominicana, a ricibi un tiro den lomba cu a sali na su bariga, cerca di su stima. El a wordo opera di urgencia dialuna marduga.
Ortiz tabata interna den condicion stabiel den e unidad di terapia intensivo di un hospital di Santo Domingo caminda cu dokternan a corta su tripanan, segun Leo Lopez, vocero di ex pelotero.