Dia 30 mei 2024 den un reunion publico a trata e ley pa haci traspaso di e tres plantanan di RWZI, e sistema di riool di Aruba, e incinerator y tur lo demas pa entidad nobo di Aruba Wastewater Sustainable Solutions N.V. (AWSS).
Parlamentario di Fraccion di MEP, Darlaine Guedez-Erasmus ta indica cu e plantanan aki a cay pa basta aña bou di Dienst Openbare Werken (DOW). AWWS lo cay bou di Utilities mescos Elmar y WEB Aruba N.V.
Ta importante pa menciona cu a traha un plan pa asina traha un planta nobo di RWZI na Bubali cu lo tin un capacidad mas grandi cu esun cu tini na e momento aki. E meta tambe ta pa modernisa e otro plantanan, upgrade e sistema di riool y soluciona e kimamento di cierto tipo di sushi cu e incinerator. Si nos mira cu tin hopi tecnologia nobo na mundo y reemplasando e mashinnan bieu pa nobo lo por haci esaki posibel y mas eficiente, Guedez-Eramus a indica.
Cu tur e modernisacionnan aki, AWSS lo percura pa evita cu e awa sushi bay pa lama. Esaki sigur lo proteha salud y medio ambiente. Sigur cu ta hopi importante pa nos hendenan local y turistanan cu ta bini Aruba y pa evita tambe e holor desagradabel cu nan mester haya.
AWSS lo tin un rol importante den purifica e awa aki pa asina por haci otro uzonan. Cunukeronan lo por haci uzo di e awa aki y sigur lo baha nan gastonan mas di e cunukeronan cu lo por ricibi e awa aki.
RWZI ta hopi crucial pa Aruba. Mi persona ta haya ta di suma importancia cu gobierno a bini cu un plan pa asina soluciona esaki. E traspaso di DOW pa un compania cu ta cay bou Utilities, sigur ta hopi positivo.
Si nos mira cu lo tin un fondo sigur pa traha un planta, cumpra materialnan y haci mantencion y asina haci’e uno duradero, Parlamentario Darlaine Guedez-Erasmus a declara.
