Durante e ceremonia di huramentacion di Parlamento nobo, nos a combersa cu Sra. Daphne Lejeuz, parlamentario pa partido MEP, tocante su vision pa e parlamento nobo.
Segun Sra. Lejuez, e enfoke ta bay pa kico pa haci pa economia, no solamente como meta, pero como e vehiculo pa drecha e situacion di tur hende aki na Aruba. E situacion tur hende sa, cu no ta uno cu ta den e miho estado al momento. Mester wak con ta mehora e economia pa sigura cu tin un trabao, cu tin entrada y cu por baha e costo di bida pa tur hende por hiba un miho bida na Aruba.
Pa loke ta trata comercio, como parti di programa di gobernacion di MEP, ta bay crea estimulonan, con por haci’e mas facil pa haci negoshi. Loke a papia hopi ariba dje, ta pa kita e red tape, pa duna e comerciante mas espacio. Si e comerciante tin espacio, nan tambe por crea mas empleo. Esey ta e meta, pa hende por bay den comercio, por cuminsa un negoshi y facilita e procesonan aki.
Tambe, obviamente diversifica nos economia den otro areanan, pa duna otro hende e oportunidad pa subi e mercado comercial, segun Sra. Daphne Lejeuz, parlamentario pa partido MEP.