Siman pasa e ley di iniciativa cu e cambionan di e kiesverordening a wordo entrega na presidente di Parlamento Mervin Wyatt Ras. Mirando cu tin urgencia pa trata e ley aki prome cu eleccion 22 September 2017 nos ta spera cu e ley aki por encamina e proceso mas lihe posibel. Manera cu e ley aki a drenta Parlamento e proceso aki a cuminsa y e ley a yega conseho consultativo (Raad van Advies) pa nan por duna un conseho riba esaki. Di e momento cu e conseho aki yega bek Parlamento nos lo traha riba esaki pa e ley ta cla pa wordo trata den sala di Parlamento. Nos ta spera cu presidente di Parlamento cumpli cu deseo di pueblo y yama e reunion aki pa asina nos por yega na un votacion.
E ley di iniciativa aki ta uno cu ningun politico a mishi cun’e y entreg’e pa asina e encamina e proceso pa wordo trata. Cu e cambionan cu a wordo proponi e siguente eleccion pueblo por scoge su representante di Parlamento por medio di cantidad di voto. E secuencia di number ta wordo elimina y esnan cu mas voto ta esnan cu lo representa pueblo den Parlamento. Como representante di pueblo bo mester por carga sosten den pueblo pa por represente y no manera ta e caso awor aki caminda tin miembronan di Parlamento cu 47 voto ta den sala ‘’represantando’’ pueblo.
E ley aki si tur cos ta bon mester por carga aprobacion unanime di sala. Esnan cu NO ta sostene e ley aki sea tin profesion robes of kier haya un ‘’lift’’ pa drenta di Parlamento. Cu e ley aki esnan cu traha duro, busca e voto ta wordo recompensa y ta drenta Parlamento automaticamente.
Nos ta spera cu Raad van Advies por entrega e ley aki mas pronto posibel bek na Parlamento mirando cu e no ta algo complica y no ta necesario pa tuma hopi tempo riba dje. E intencion ta pa e ley aki wordo trata no mas tarda aki 6 siman.