E Gobierno aki a demostra incapas pa guia nos pais na progreso. Un sin fin di decisionnan robes y prioridadnan robes a conduci cu awe nos pais ta den un caos. Un pais cu un debe di mas cu 4 biyon florin, un pais sin crecemento economico, un pais caminda e consumidor no tin confiansa den finansas publico y economia. E problemanan cu e Gobierno aki a causa a yega den tur skina. No solamente e pueboo a sufri sino comerciantenan tambe a sufri. Caya Betico Croes a wordo mata pa e Gobierno aki.
Tur e problemanan cu Caya Betico Croes ta aden actualmente a cuminsa for di momento cu e proyecto di tram a cuminsa. Un proyecto di renobacion cu lo mester a dura maximo 2 aña a dura 5 aña. E contratista cu a gana e bid NO por a caba cu e proyecto y finalmente ta DOW a bin purba finalisa e proyecto aki. Desde un principio por a mira cu e tramnan NO lo duna resultado. A usa fondonan cu tawata disponibel a e proyecto di Mavo, Havo, VWO na Noord pa cumpra 4 tram y pone e infrastructura. E proyecto di tram cu ta encera 4 tram y e rails y infrastructura a costa nos pueblo 32 miyon sin cu NINGUN dia el a duna un resultado. Comerciantenan tur ta bisa cu NUNCA e tram mester a bin y cu e tram a traha contraproductivo. Enbes cu a trece cliente pa nan, nan a mira cada aña menos y menos cliente y menos benta.
Pa completa e asunto Gobierno di AVP a introduci Aruparking cual tabata otro medida riba lomba di pueblo. Nan a cobra pueblo 2 florin pa ora pa parkeer den Caya y tambe cobra empeladonan cu ta labora den Caya 900 florin pa aña, Mi a bisa cu Aruparking lo bay caba y mata Caya y ta esaki ta loke a sosode. Awe nos ta haya rason y prome minister Mike Eman mes ta confirma esaki.
Nos a bishita Caya Betico Croes y nos a trece e imagenan pa pueblo mes por wak con e situacion den Caya ta. Un situacion hopi penoso caminda tin mas tienda cera cu tin tienda habri den Caya. Durante nos bishita nos a constata cu tin 42 tienda a cera nan portanan. E situacion den Caya no a bira mihor sino a empeora.
Remarcabel ta e hecho cu prome minister Mike Eman y henter su Gobierno NO a tuma ningun accion pa yuda Caya Betico Croes te cu ayera. Mike Eman a prefera di laga 42 tienda cera nan portanan, laga 120 mama y tata di famia perde trabou prome cu nan actua, Mike Eman a prefera di sali na beneficio di su Gobierno enbes di na biniestar general y sali na defensa di mama y tatanan di famia. Awor cu Otmar Oduber a entrega su retiro, Mike Eman kier actua. Otmar Oduber a bisa cu el a retira di AVP pasobra el a bisa cu AVP a usa e poder cu pueblo a duna nan pa haci y deshaci. Awor a para bira cu Mike Eman ta culpa Otmar Oduber y na su turno esaki ta culpa Benny Sevinger. Hecho ta cu esnan responsabel pa e deterorio di Caya ta Mike Eman, Benny Sevinger, Otmar Oduber y henter e Gobierno di AVP. Nan vision pa Caya a fracasa, NO a duna resultado y conduci na un Caya Betico Croes bandona.
Awor Mike Eman kier bin hunga heroe na momento cu el a flexibilisa e orarionan di Aruparking siendo cu e ta mes of mas culpabel cu Otmar Oduber! Mi a presenta solucionan pa Caya pa yuda alivia e situacion y awor porfin Gobierno a cuminsa tuma accion!