Nos pais ta den problemanan hopi serio. E explosion social cu a wordo causa pa gabinete Mike Eman 1 y 2 ta wordo sinti den tur skina na Aruba. E problemanan di nos pais ta grave y esaki a conduci na un aumento drastico di criminalidad. E Gobierno aki no di awo sino for di comienso no por a fiha kico ta prioridad den gobernacion. Prioridad nunca por tabata bin cu 4 tram cu a costa nos pais mas cu 30 miyon florin y awe mas bien a mata Caya Betico Croes pasobra e tram a impedi circulacion di trafico.
Nos pais na e momentonan aki ta wordo sacudi pa un ola di criminalidad, un ola di atraco y hasta un ola di asesinato. Minister di husticia Douwers a bisa den Parlamento cu e mester minimal 10 miyon florin extra pa combati criminalidad pero en realidad e mester 50 miyon florin extra. Loke nos no por compronde di e ponencia aki ta e hecho cu e tambe ta forma parti di gabinete Mike Eman 2 y mi ta asumi e ta tambe den e conseho di minister. Con por ta posibel cu no tin placa pa atende cu crimnalidad y di otro banda proyectonan manera Green Corridor y Watty Vos Boulevard ta sigui normal y ta proyectonan cu ta costa nos pueblo casi 700 miyon florin. Prioridad awor aki ta pa garantisa nos pueblo siguridad. No por ta asina cu ciudadanonan ta sera porta di nan cas 7or di anochi y ta biba den angustia y miedo. No por ta asina cu un Gobierno ta inverti 700 miyon florin den infrastructura y no tin placa pa enseñanza, no tin placa pa construi scolnan, no tin placa pa combati criminalidad. E ta imcomprendibel y absurdo con un minister presidente ta hiba un maneho asina. Mike Eman como prome minister di e pais aki ta esun responsabel y esun culpabel pa e decadencia y deterorio di nos pais. E ta esun cu ta scoge pa inverti placa di pueblo den prioridadnan robes. E ta esun responsabel pa e insiguridad cu ta reina den pueblo awor aki. Como prome minister e mester por fiha prioridad pa su Gobierno y esaki no a wordo haci. E problema di criminalidad ta touch nos tur cu ta biba riba e pais aki. Criminalidad no tin color politico y nos mester atende cu esaki awor. Prome minister mester asui su responsabildiad y stop di sconde pa pueblo. Duna pueblo cara, duna pueblo splicacionan, atende cu e problemanan di pais Aruba y stop di core pa bo responsabilidad.
Un prome minister cu ta core pa su responsabilidad y no por atende cu problemanan di pais no por ta digno di confiansa di nos pueblo!