Lamentablemente nos por a constata cu Otmar Oduber a laga e homber chikito, e mediano, e taxistanan, e doñonan di restaurant, doñonan di watersport, esnan cu ta traha cu turistanan tur cay. Nos a spera un minister di turismo cu ta para pa su palabranan y ta defende interes di pueblo. Nos nunca a spera un minister cu ta bandona e lucha contra all inclusive y aproba un ley cu ta sigui yena nos pais cu cambernan all inclusive. Pa ser exacto, e ley cu a wordo aproba pa fraccion di AVP y tambe pa Marisol Lopez Tromp ta pa habri caminda pa 1500 camber all inclusive.
E discusion ta keda cu Otmar Oduber kier yena nos pais cu camber nan all inclusive. Bao di maneho di otmar e cantidad di cambernan all inclusive a aumenta di 41% pa 54.8%. Pakico, pasobra Otmar Oduber no a trece e turista cu nos pais mester di dje. Hotelnan ta core riba ocupacion abou y pa yena nan camber hotelnan cu NO ta all inclusive tambe ta ofrece cambernan all inclusive pa yena nan hotelnan.
Na e momentonan aki 32% di nos inventario di cambernan di hotel ta all inclusive. Den e ley cu ta wordo trata y aproba, e minister ta duna espacio pa e cantidad di cambernan all inclusive yega te na 40%. Es decir, tin espacio pa 8% mas. Kico e 8% aki ta significa den cantidad di camber pa nos pais. Esaki kiermen segun ATA cu tin espacio pa 1500 camber mas all inclusive.
Durante e reunion fraccion di MEP a presenta un amienda pa mantene e cantidad di cambernan all inclusive na 32%. Es decir fraccion di MEP no kier mira expansion di cambernan all inclusive tanten cu no tin estudionan haci y tin consensus entre Gobierno y sector priva. Nos a spera un reaccion positivo di Otmar Oduber y di fraccion di AVP pa cu nos amienda pa pone un PARO na mas camber all inclusive. Lamentablemente fraccion di AVP a vota contra e homber chikito, contra e taxistanan, contra e restaurantnan y contra interes general di Aruba y a vota contra nos amienda. Partido AVP a confirma cu nan kier 1500 camber all inclusive mas pa nos pais.
AVP kier usa e pretexto cu MEP ta contra desaroyo na San Nicolas cual ta un otro gañamento pasobra tur e cambernan all inclusive ta destina pa PABOU di brug. Otmar Oduber no por a bin cu un desaroyo pa Bushiri y awor cu nos ta den porta di eleccion kier bolbe bin cu promesanan falso pa san Nicolas.
Un cos ta sigur, Otmar Oduber a desapunta pueblo cu su decision pa sigui yena nos pais cu cambernan All Inclusive y a demostra cu e no ta sirbi interes general sino interes the Boss.