Pueblo di Aruba puntra bo mes si en berdad bo situacion financiero a bira miho e ultimo 7 aña nan. Puntra bo mes un rato bo salario a bira mas, puntra bo mes un rato si costo di bida a baha y poder di compra e mehora. Puntra bo mes un rato si BBO a bira menos, si awa y coriente a bira mas barata, si gasolin ta mas barata. Puntra bo mes si en berdad bo siguridad na cas i riba caya a bay dilanti. Puntra bo mes si e educacion di bo yiunan a mehora. Puntra bo mes si bo salud of servicio di salubridad a mehora.
“En la lucha” ta e contesta mas hopi cu mi ta haya durante mi bishitanan na cas den diferente bario. Mi ta bisa na cada un di boso cu ami ta dicidido pa drecha e situacion pa cada un di boso. E pais aki mester di gobernantenan cu un moralidad halto, cu un integridad halto y di e gobierno aki di AVP sigur nos no por a wak esaki. Pa 7 aña nos a wordo gaña y manipula pa un gobierno cu ta kere e por sigui gaña y manipula pueblo. Ningun hende a progresa e ultimo 7 añanan aki. Bida no a bira mas facil na Aruba sino mas dificil.
Mi ta convenci cu e amor, pasion, dedicacion i persistencia nos lo persevera y laga nos pais bolbe bek na su gloria. Awe nos tur ta struggle, cu excepcion di un grupito di coordinadornan, famia amigonan i sponsornan di e gobierno actual di AVP. E ser humano a ser lubida, esunnan mas vulnerabel ser lubida y esunnan rond di Mike Eman y AVP ta e uniconan cu a conoce prosperidad. Ningun cas social a wordo construi, no tawata atencion pa nos hobennan, a neglisha enseñansa y tambe deporte.
Cu placa por cumpra y haci hopi, pero cu un pueblo dicidido por haci mucho mas. Mester duna pueblo locual ta di pueblo. Parlamento mester bira un parlamento cu por i ta controla debidamente, no mas “stempel parlament”! Malgastamento di placa cu a nos y nos yiunan i nan yiunan mester bay paga bek mester bira historia! Pueblo mester di alivio, Belasting mester baha, poder di compra mester subi. No un Aruba green, pero un Aruba SANO!! Nos medio ambiente ta importante pa nos tur i ami ta e prome cu lo bay den defensa di esaki, pero si e tin cu bay a costo di nos digno pueblo mi lo para i lucha pa pueblo prome.
Mi ta sumamente agradecido pa e sosten cu mi ta hayando ultimo tempo i mi kier bisa boso tur cu ami nunca y hamas lo defrauda e confiansa duna. Nunca y hamas lo mi gaña pueblo di Aruba! Mi unico compromiso ta pa tur hende tin un futuro briyante caminda prosperidad ta wordo sinti tur caminda y no cerca esunnan yega na e gobernante so. E gobierno mester bira un gobierno di pueblo, cu pueblo y pa pueblo!