Pa decadanan e kiesverordening no a wordo cambia y adapta y a yega e momento promer cu eleccion 2017 pa esaki wordo cambia. Como politico nos mester duna oido na deseo di pueblo y e pueblo ta anhela cambionan di e kiesverordening. Na e momentonan aki un representante di pueblo ta wordo scogi por medio di voorkeurstemmen of por medio di su number riba lista politico. E ley aki no ta uno husto y tampoco ta refleha deseo di pueblo den e cas di pueblo. Tin hopi politico ta haya confianza y sosten di pueblo pero finalmente no ta drenta parlamento pa motibo di e ley y e sistema cu nunca a wordo cambia. E cambio di e kiesverordening ta algo cu mester wordo haci pa e por ta representativo pa deseo di pueblo. Mi no ta kere cu por tin un politico of un miembro di Parlamento cu por ta contra deseo di pueblo y contra e cambionan aki. E cambionan cu ta wordo proponi ta cu un reprsentante di pueblo (miembro di Parlamento) lo wordo scogi por medio di voorkeurstemmen of por medio di CANTIDAD di VOTO y no a base di numeracion mas manera ta e caso actualmente. Es decir entrante eleccion 2017 si haya sosten di mayoria den sala di Parlamento esnan cu haya voorkeurstemmen lo drenta automaticamente sigui pa esnan cu ricibi mas voto den eleccion 2017. E politico of partido politico cu ta contra e cambionan aki no merece confiansa di pueblo pasobra nan no kier cambia e sistema y kiesverordening anticua aki y tin miedo pa mehora e sistema. No solamente esaki mester wordo cambia sino mester bin cambio tambe den e manera con Parlamento ta funciona. Nos mester reforma e manera con parlamento di Aruba ta funciona y haci’e esaki mas democratico posibel. Den practica bo ta nota cu AVP a haci y deshaci e ultimo 8 añanan aki y ningun parlamentario di AVP a haci nan trabou manera mester ta. Nan no a controla gobierno, nan a aproba tur e presupuestonan cu a conduci nan kiebro di nos pais pais y a aporba medidanan cu a kita e poder di compra di pueblo.
Nos di fraccion di MEP lo haci nos maximo esfuerso pa entrega e cambionan di e kiesverordening mas liher posibel y nos a cuminsa encamina e proceso caba y ta spera cu esaki por carga sosten di sala di Parlamento pa e por bira un realidad cu pueblo di berdad por wordo representa manera debe ser!