Nos ta bisa loke nos ta pensa y haci loke nos ta bisa. Algun siman atras mi persona a anuncia cu mi lo bai haci cambio na e kiesverordening pa cambia e manera con un miembro di parlamento ta wordo eligi/scogi. E ultimo simanan aki a traha riba e memorie van toelichting y tambe a haci e cambionan necesario.
E cambionan ta encera cu no a base di secuencia di number mas riba lista politico lo drenta parlamento ora un partido saca asiento sino a base di cantidad di voto. Na momento un candidato cu ta figura riba lista politico haya ‘’voorkeurstemmen’’ (saca su mes) e lo drenta automaticamente sigui pa esnan cu mas voto riba e lista politico. Di e manera aki lo caba cu e sistema actual caminda esnan cu no tin voto ta yama nan mes represenante di pueblo.
Awor cu e cambionan ta cla e ley di iniciativa aki lo wordo manda Directie Wetgeving en Juridische Zaken pa por haya un conseho riba esaki. Una bes cu e conseho aki drenta e ley cu e cambionan lo wordo manda pa Raad van Advies y esaki lo por dura entre 4-6 siman. Manera cu ricibi e conseho di Raad van Advies lo contesta esakinan y entrega e concepto di ley aki den man di presidente di Parlamento Sra Mervin Wyatt Ras cu tur e confiansa cu e lo yama e reunion aki pa trata e ley aki. Mi no por imagina cu e reunion pa trata e ley aki no lo wordo yama y menos pensa cu tin miembronan di parlamento di Aruba cu ta contra e cambionan aki. Esun cu ta contra esaki sigur lo wordo husga e eleccion aki mirando cu nan no kier cambio y no ta pensa progresivo.
Mirando cu ta aña di eleccion ta importante pa e ley aki wordo trata na tempo pa asina tambe cumpli cu deseo di pueblo. No for di awor pero for di hopi tempo caba pueblo kier mira cambio den e sistema democratico. Awor por ehempel tin miembronan den Parlamento cu 47 voto sinta eyden como ‘’representante’’ di pueblo y otronan cu 10 bes mas voto cu nan mes a keda afo. E sistema no ta husto y tampoco ta uno democratico y a yega e momento pa trece cambio den esaki.
Na momento cu e cambionan aki bira realidad bo lo mira cu deseo di pueblo por medio di su voto ta wordo representa den sala y cas di pueblo.
No solamente nos ta trahando riba e concepto di ley aki sino tambe e ley pa trata castigo minimo pa e muchanan cu ta wordo abusa. E concepto di ley aki ta cla y mirando e hecho cu gobierno no kier atende cu esaki nos fraccion lo haci esaki pa evita castigonan abou manera te e caso actualmente.