Diahuebs ultimo a tuma luga un reunion den parlamento pa trata 2 punto di agenda cualnan tabata e ley tocante penitentiaire beginselen y e otro punto di agenda tabata e aumento di criminalidad ultimo temponan. Manera ta custumber caba den Parlamento ora yama ministernan pa bin duna cuenta enbes cu ta haya mas informacion ta keda sin haya informacion. Durante e reunion aki fraccion di MEP a haci diferente pregunta al caso na minister di husticia Dowers cu e speransa cu nos lo haya mas claridad con Gobierno y e minister en cuestion ta atendiendo cu e ola di criminalidad. Nos a puntra minister Dowers si e por informa Parlamento cuanto asesinato tin registra e ultimo 7 añanan aki. Nos a spera di por a haya un contesta riba e pregunta aki cual nos no a haya. E siguiente pregunta cu nos a haci minister Dowers ta si e por informa Parlamento cuanto arma di candela a wordo confisca e ultimo 7 añanan aki. Nos a puntra minister ki accion e minister lo bay tuma pa frena e cantidad alarmanete di atraco cu tin na e momentonan aki. Nos a puntra minister dicon e situacion a sali for di man manera cu e ta na e momentonan aki. Lamentablemente nos no a haya contesta riba NINGUN di nos preguntanan y mas bien minister a bay den defensa y schuif su responsabilidad di scochi di pueblo y den scochi di otro coleganan. Segun minister Dowers e problema di criminalidad ta partido MEP a causa y tur e hobenan cu ta cometiendo atraco a nace den gobernacion di MEP. Mas aleu e minister a sigui bisa cu no ta su culpa cu tin asina tanto ladronicia y atraco sino ta culpa di nos sistema cu a faya, ta culpa di mayornan cu no por educa nan yiunan. Ora un minister bisa esaki nos mester puntra nos mes kende ta den Gobierno e ultimo 7 añanan aki? Si e sistema a faya ta kende ta responsabel pa coregi e sistema cu segun minister Dowers a faya. Ironia ta cu tempo Dowers tabata den opiscion ta e ex minister di husticia y e Gobierno anterior tabata culpabel y responsabel di tur cos. Awe cu e ta minister e ta culpa tur hende, e ta culpa MEP, e ta culpa mayornan, e ta culpa sociedad, e ta culpa e sistema sin cu mes ta asumi su responsabilidad. E ta esun cu ta politicamente responsabel pa e caos cu a wordo crea. Na e momentonan aki na aña 2016 tin 53 atraco registra cualnan ta atraconan cu a wordo cometi cu arma di candela. Ta un situaccion hopi pero hopi preocupante cu tin na e momentonan aki. Tin un comision di siguridad cu ta organisando un marcha y nos sigur ta sostene e marcha aki y ta haci un yamada na henter e comunidad di Aruba pa hunto pa ban pone un paro na e ola di criminalidad y ban exigi Gobierno tuma accion pa nos por biba den trankilidad. E marcha lo ta dia 13 di October y nos ta spera cu por conta cu tur esnan cu ta preocupa cu e insiguridad cu tin na Aruba. Ban nos tur hunto, demostra union pa un causa husto, nos SIGURIDAD!