Ta fresco den nos memoria con na aña 2014 y 2015 pais Aruba a celebra yegada di mas di 1 miyon turista. Nos por corda con minister Otmar Oduber tabata papia con exitoso turismo ta y cuanto turista el a logra trece Aruba. Awe na aña 2016 e panorama turistico a cambia por completo. Awor e mesun minister di turismo ta yama e turistanan cu el a broma cu nan y cu a yud’e surpasa 1 miyon turista pa ‘’raspa cupos’’. No solamente esaki sino su colega minister di husticia ta bisa cu gran mayoria di e crimennan ta wordo haci pa e hendenan di pazuid, aki referiendo na e turistanan Venezolano. Nos mester ta serio y sincero cu nos pueblo y no hunga cu turismo manera cu Otmar Oduber si ta haci.
E minister di turismo aki ta hungando cu turismo y ta hungando cu nos unico pilar economico. Su amigo y ex lider di AVP a haci un investigacion caminda ATA a pag’e $250.000 pa midi e efecto di turismo riba felicidad di nos pueblo. Segun e resultado 78% di nos pueblo ta contento. No stun cu puntra nos mes kedenan a wordo encuesta, si ta ministernan di AVP, parlamentarionan di AVP y coordinadornan. E pueblo aki ta sufriendo y sigur no ta contento. Turismo no ta loke Otmar Oduber ta pretende cu e ta y e aña aki esaki a wordo demostra. Minister di husticia Dowers a bisa cu pa ultimo 2 añanan tin avion completo for di Venezuela a bin caminda practicamente tur pasahero tabata tin un carta di un garantsteller. Locual minister Dowers ta trece dilanti aki ta e hecho cu nos no ta papiando di turistanan sino hendenan cu ta bin Aruba cu otro intencion.
E situacion cu e turismo nobo a crea a pone cu minister Dowers a anuncia cambio di maneho pa loke ta trata e rekisitonan cu ta pidi pa un persona por fungi como garantsteller ora un turista ta bin keda cerca dje. Na Aruba ta e unico pais na mundo caminda un turista por keda 6 luna y caminda e unico exigencia di Gobierno pa e garantsteller ta cu e mester por prueba cu e ta gana salario minimo. Na e momentonan aki e salario minimo no ta yega ningun hende cu ta biba riba e pais aki. E costo di bida haltisimo y e poder di compra a bay atras drasticamente. Despues di 7 aña minister Dowers a bin realisa cu mester haci algo y Gobierno a anuncia un cambio di maneho.
Loke si a keda demostra ta cu Otmar Oduber a gaña nos pueblo 2 aña largo cu un crecemento ficticio den nos turismo y awe na aña 2016 minister Dowers ta confirma esaki. Ta lamentabel cu minister Oduber kier manipula cu crecemento ficticio.