Durante tratamento di presupuesto 2017 di ministerio di infrastructura hopi prueba a wordo presenta cu ta duna indicacion cu tin actonan di corrupcion tumando lugar. Dia pa dia ta bira mas obvio cu minister Sevinger no tabata tin un maneho e ultimo 7 añanan aki. E no ta tene cuenta cu desaroyo den nos turismo, e no ta tende cuenta cu e moratorio cu tin riba mas camber di hotel, e no ta tene cuanta e ley di ordenansa publico y mas bien ta tuma decisionnan basa riba kende ta paga mas pa haya mas. Esaki ta e decadencia den gobernacion. Esun cu por paga mas ta esun cu ta haya mas. Puntre ken cu bo kier riba caya con bo ta haya tereno, con bo ta haya bestemmingsbwijzijging, con bo ta haya permiso di estadia pa keda Aruba. Mi kier bisa minister Sevinger cu gobernacion NO ta un negoshi. Gobernacion ta algo serio.
For di aña pasa nos a pidi minister Sevinger e lista di terenonan comercial cu a wordo otorga e ultimo 7 añanan aki. Durante e tratamento di presupuesto aki nos a bolbe puntra minister e lista aki. Ta parce cu e lista aki lo ta un ‘’staatsgeheim’’ y minister NO kier comparti e lista aki cu Parlamento. Kico di sconde tin, nos no sa pero hecho ta cu ni kico nos a haci, ni cuanto nos a pidi e lista aki, Benny Sevinger no kier a comparti esaki.
Te dia di awe nos ta warda e lista di terenonan comercial cu a wordo duna e ultimo 7 añanan aki. No tin transparencia. Benny simplemente no kier duna pueblo cuenta. Despues di e tratamento di presupuesto di minister Sevinger un biaha mas a opta pa no comparti e lista aki cu Parlamento y asina aki pueblo no ta haya sa kendenan a haya terenonan comercial e ultimo 7 añanan aki.
Cu prueba den man nos a trece dilanti con un famia a haya 90.000 M2 di e pueblo aki pa pone esakinan na benta. Ta tristo y condenabel cu Benny Sevinger willens en wetens ta coopera cu corupcionnan aki. Ta obvio cu e pueblo a ser lubida y e minister aki y e gobierno aki ta pone pueblo na ultimo luga. Den 7 aña tin mas cu 12.000 persona wardando pa un pida terenom tin 3000 persona wardando pa un cas social pero esakinan NO ta prioridad. Prioridad ta duna un damita di 19 aña 5000 M2 di tereno riba Sasaki pa pone esaki na benta. Prioridad ta parti tereno pa e grupo privilegia aki pa pone tur tereno na benta. Tur esaki ta pasa cu conocecemento di minister Sevinger. Durante e reunion aki minister Sevinger a bin cu un cantidad di acusacion sin base , sin pia y cabes y mas bien a purba desvia atencion di loke e ta haciendo cu patrimonio di pueblo.
No ta un prueba a wordo presenta sino un cantidad di prueba caminda ta bisto cu minister Sevinger a pone henter nos pais na benta. Na e momentonan aki te hasta e ROP ta wordo cambia pasobra na caminda tereno a caba cu Benny. Un minister asina aki NO ta digno di confiansa di e pueblo aki y si fraccion di AVP no kier husg’e, pueblo lo sa di husg’e otro aña!