Dangui Oduber (MEP): Minister Benny Sevinger NO por a contradeci e pruebanan cu fraccion di MEP a trece dilanti!

E reunion tocante otorgamento di tereno di pueblo na amigo, coordinado y sponsornan di campaña a sigui diabierna ultimo den sala sala di Parlamento. Diabierna a toca turno na minister Sevinger pa contesta tur e preguntanan cu miembronan di Parlamento a haci su persona durante primera tanda. No solamente preguntanan a ser haci na minister Sevinger sino un cantidad di prueba a ser presenta pa ilustra e fiesta di bendemento di tereno cu tin bao supervision di minister Sevinger. Durante e reunion mas bien Benny Sevinger a confirma cu e mes ta na altura di tur loke ta pasando y esaki ta condenabel y castigabel.
Nos a spera cu minister Sevinger lo a contesta e preguntanan y tambe responde pueblo riba tur e pruebanan cu a ser presenta. Fraccion di MEP a presenta pruebanan caminda henter nos pueblo por a wak con e grupo yega na Mike Eman a pone nos pais benta. A presenta actonan di notario, a presenta registro di camara di comercio, e presenta corespondencianan di email di despacho di minister Sevinger cu bendedornan di tereno, a presenta corespondencia di email caminda ta pidi downpayment di 100.000 florin pa tereno wordo bendi na Barcadera, a presenta finders fee agreement y tambe a presenta tur e ministeriele beschikkingen cu a ser firma pa minister Benny Sevinger. Tin email nan cu ta prueba cu Leoncita Arends ta wordo informa via email cual terenonan tin disponibel y e por scoge cua tereno e kier. Cual ciudadano riba e pais aki ta haya un email for di Benny Sevinger cu e choice di por scoge cual tereno ta mas miho. Tin 11.000 hende riba lista di espera pa por bin na remarke pa haya no un tereno comercial sino un pida tereno pa traha un cas. Ningun di e hendenan aki no ta haya email for di despacho di minister Sevinger caminda nan tin e oportunidad pa scoge e miho tereno. Tin un damita di 19 aña cu a haya 5000 M2 riba Sasaki pa pone esaki na benta pa 2.4 miyon dollar. Benny Sevinger kier a hustifica den Parlamento cu no ta pasobra e damita tin 19 aña e no tin placa pa bin cu un desaroyo. Aki e la haci compracion di e damita cu e fundador di facebook pa demostra cu apesar cu e fundador di facebook ta hoben e tin placa. Tambe Sevinger a bisa cu e no a ricibi ningun email pasobra el a lubida su password. Apesar cu varios email a wordo manda pa Sevinger e ta bisa cu e no a ricibi ningun. Kende ainda por kere tur e storianan aki di Sevinger. Simplemente Benny Sevinger NO por keda minister despues di tur e pruebanan cu a wordo presenta!
E discusion den Parlamento no tabata dirigi riba maneho di MEP. AVP tin 7 aña na mando y ainda Benny Sevinger tin e curashi pa hustifica e corupcionnan aki bayendo bek den pasado. Loke pueblo kier sa di minister Sevinger ta si e tambe ta forma parti di e bendemento di tereno cu tin na e momentonan aki. Nos no ta cuestiona kende ta haya tereno, loke nos ta cuestiona ta e hecho cu gruponan AVP ta haya terenonan comercial y no ta desaroya esakinan sino ta pone tur na benta. Prijsnan pa e terenonan ta varia entre $200.00 te na $2.4 miyon dollar dependiendo na unda e tereno ta situa y tambe e grandura di terenonan.

Comments

comments