E ruinanan di Ex Bushiri Hotel tin number y fam, AVP y Otmar Oduber. Hunto nan a haci e promesa na e pueblo aki cu manera cu nan drenta den Gobierno, cual ya caba ta casi 8 aña pasa e ruinanan aki lo ta pa pasado. Awe e situacion ta mucho mas pio. E luga a bira un shelter pa adictonan ambulante y esaki ta un di e prome impresion cu un turista ta haya ora e yega nos pais. Ki impresion nos ta duna e turista ora e ta pasa dilanti e ruinanan aki?
Pa 7 aña largo AVP y Otmar Oduber NO a haci nada pa trece cambio den esaki. Nan a presenta net prome cu eleccion na aña 2013 un proyecto fantasma cu for di comienso caba por a anticipa cu nunca lo mira luz di dia. di MEP a informa nos pueblo caba cu nos lo kier mira un solucion mas pronto posibel pa e area aki cua ta un beachfront y un beach sumamente bunita cu por wordo drecha y mehora. Nos ta kere den un desaroyo turistico pa e area aki pero manera nos a bisa un desaroyo di un hotel estilo Boutique Hotel pa nos por atrae di berdad e turistanan cu ta gasta hopi placa den nos economia.
Den Parlamento di Aruba un mocion a wordo aproba for di masha tempo pa urgi Gobierno pa benta e edificio di Ex Bushiri Hotel abou mirando e mal imagen cu esaki ta crea cerca nos bishitantenan. Te dia di awe, cu falta apenas 10 luna pa e eleccion, Gobierno di AVP NO a duna oido na e mocion aki y ta parce cu nan NO ta tin respet pa Parlamento y no ta haci absolutamente nada cu e mocionnan cu ta wordo aproba den Parlamento. Nan mes ta falta respet pa nan mes pasobra ta fraccion di AVP mes a presenta e mocion aki cu, te dia di awe e no a wordo honra.
Kico Gobierno ta warda nos no tin ningun idea pero hecho ta cu dia pa dia e situacion ta birando pio y tin hopi turista ta comentando esaki caba indicando e deterorio di nos pais. No solamente tin Ex Bushiri Hotel sino tambe John F Kennedy School cu Gobierno a laga den un estado di decadencia sin cu a haci nada al respecto.
E negligencia di e Gobierno aki ta bisto y ta obvio cu nan tin prioridadnan completamente robes. No por ta asina cu Parlamento ta aproba un mocion y ta urgi Gobierno pa tuma accion y Parlamento di Aruba no ta haya oido ni e respet cu e merece. Esaki ta pasa ora un Gobierno ta kere cu e por haci y deshaci cu e mandato cu e pueblo a duna nan. Nos pais no merece di ta wordo goberna pa un grupo di hende iresponsbel cu ta pone nan interes y interes di nan amigonan como prioridad.
Nos pais no a conoce ningun desaroyo di 5 strea e ultimo 7 añanan aki y no a conoce un miho producto turistico. E ruinanan di Ex Bushiri Hotel ta muestra y ta ilustra con nos pais a wordo goberna e ultimo añanan aki.
Dentro di corto nos lo presenta un plan completo cu e solucion cu MEP tin pa e area aki caminda sigur lo ta un desaroyo combina caminda pueblo tambe lo ta participe na dje. Nos ta exigi di Gobierno pa tuma accion y benta e edificio aki abou pa asina evita e mal impresion cu turistanan ta hayando!