Dia 13 October 2016 miles di hende a subi caya pa demostra na un manera pacifico contra e aumento drastico di criminalidad na Aruba. E comision pro siguridad cu a lidera e marcha a entrega un manifiesto na prome minister Mike Eman y tambe na minister di husticia Arthur Dowers. A keda accorda 3 punto cu gobierno lo mester cumpli cu nan di inmediato. Un di e puntonan cu Gobierno mester a cumpli cune ta aloca 10 miyon florin pa combati criminalidad. Prome minister Mike Eman a firma e manifesto y a garantisa e comision pro siguridad y tambe e miles di persona cu a subi caya cu e lo cumpli cabalmente cu loke a keda acorda. Un biaha mas nos mester constata cu Mike Eman a bolbe gaña nos pueblo. Pa 7 aña largo nos pais a wordo goberna pa un prome minister cu NO ta tene su mes na palabracionan y ta gaña nos pueblo. Nos ta lamenta profundamente cu ainda Gobierno no a pone mas placa disponibel pa combati criminalidad mirando cu e situacion desde 13 di October no a bira miho sino a empeora. Nos a spera cu Gobierno lo a tuma accion y manda un nota di cambio pa Parlamento pa asina aloca 10 miyon florin pa minister di husticia. E siman aki un biaha mas Aruba a wordo azota pa mas atraco, mas ladronica y tambe joyriding di auto. Tambe tin un cantdidad di casonan caminda ilegalnan ta yega nos pais, te hasta animal ta wordo importa ilegalmente y avioneta tambe ta baha ilegal riba pista na aeropuerto. Ta parce cu e Gobierno aki ta stimula ilegalidad enbes cu ta combati esaki. E situacion na Aruba ta uno hopi serio caminda un Gobierno e neglisha biniestar di nos pueblo y a crea pobresa y problemanan social hopi serio. Nunca antes Aruba a sinti su mes asina insigur caminda nos pueblo ta biba manera prisionero den nan propio cas.
Nos ta exigi di Gobierno pa cumpli cu loke a wordo acorda pa asina evita mas accion. Na momento cu Gobierno no kier duna oido na pueblo y ta neglisha tur esnan cu a subi caya y manifesta no lo keda nada otro pa sigui cu e accionnan te ora Gobierno recapacita y tuma accion pa garantisa nos pueblo nos siguridad.
Ta obvio cu e gobierno aki NO a cumpli cu nan plana di campaña y mas bien a tuma henter un pueblo haci. Promer minister NO tin control mas riba e pais y ta yegando e momento pa e gobierno aki hala un banda y laga otro haci e trabounan necesario. Nos pueblo simplemente ta sufriendo bao di e maneho di e gobierno aki y kier mira un cambio pa asina nos por biba den tur trankilidad!