For di luna di Januari 2016 fraccion di MEP a haci peticion pa un reunion publico cu minister di infrastructura Benny Sevinger pa e por bin duna cuenta na pueblo riba negoshi cu patrimonio di pueblo. Ta bon conoci caba den comunidad cuanto tereno comercial cu a wordo otorga na diferente grupo y famia den comunidad a wordo poni na benta. Pa nos ta inaceptabel cu Benny Sevinger ta tolera y aproba speculacion cu patrimonio di pueblo manera ta pasando. E fiesta aki ta parce no tin final. Mientras famianan ta sclama pa por bin na remarke pa un pida tereno pa traha cas Benny Sevinger ta sigui haci fiesta cu patrimonio di nos pueblo. Mientras tin 11.000 hende wardando un pida tereno y otro 3000 mas wardando un cas social e fiesta y saga cu tereno di pueblo ta sigui.
No ta solamente un famia a beneficia sino amigo intimo y personal di Benny Sevinger tambe a wordo privilegia. Un cos ta sigur, pa pueblo Benny no a traha pero pa e grupo di famia y amiguito si. Den 2 grupo yega na Benny nan a haya na tur 120.000 M2. Esaki simplemente ta un abuso di marca mayor y un minister asina aki NO por keda como minister. Si tin hende cu consenshi den fraccion di AVP y di berdad ta stima e pais aki anto e ora e hendenan aki mester pone un paro na tanto fiesta cu tin tumando lugar.
Dialuna nos ta invita henter e comuidad di Aruba, tur esnan cu ainda no a haya tereno, tur esnan cu ainda no a haya cas social pa sigui e reunion aki cu hopi atencion pasobra nos lo presenta tur prueba cu tin y nos lo laga fraccion di AVP husga nan minister y tambe nos lo laga pueblo husga Benny Sevinger pa wak si e ta un persona integro.
Un minister cu ta traha pa biniestar di pueblo ta yuda su pueblo, e no ta yuda un grupito so. Un minister no tey pa haci enrikece esnan rond di dje, esnan cu ta traha cun’e y esnan cu ta sponsor’e. Tur hende riba e pais aki por wak con Benny Sevinger a haci y deshaci cu patrimonio di pueblo y awor te hasta lo bay cambia e Ruimtelijke Ontwikkelingsplan pa sigui otorga terenonan.
Ta un inhustica grandi y un crimen loke Benny Sevinger a haci e ultimo añanan aki. Benny NO tin ningun argumento pa pa defende su mes pa hustifica e fiesta cu terenonan di pueblo. Ora e bisa tur hende tin derecho di pidi un tereno e mester corda cu NO ta TUR ta haya e tereno cu nan pidi. Mas lamentabel ta cu e grupo di Benny Sevinger ta pidi tereno, no pa desaroya esakinan sino pa bende esakinan y bira miyonario riba custia di pueblo.
Benny por wordo considera e director di e compania di real estate y e ta e King of Real estate di Aruba. Nos ta reta Benny pa duna pueblo cara y duna pueblo cuenta riba tur e casonan cu lo wordo presenta!
- Latest
