Durante e reunion di otorgamento di tereno dialuna 5 September fraccion di MEP a presenta prueba tras di prueba cu tin speculacionnan y bendemento di tereno tumando luga. Tur e speculacionan aki ta pasando bao supervision di e King of real estate benny Sevinger. Varios prueba a wordo presenta durante e reunion aki y minister Sevinger a wordo cuestiona severamente pa su maneho descabeya manera cu su colega Otmar Oduber a describi su maneho.
Den e pruebanan cu a wordo presenta tin peticionnan cu a wordo haci, ministeriele beschikking cu a wordo firma pa Benny Sevinger, emailnan cu ta sali for di despacho di minister pa haci donacion na fundacionnan yega na Benny Sevinger y te hasta documentonan di ‘’finders fee agreement’’ pa esun cu bende e terenonan. Nos por a nota un minister Sevinger hopi nervioso y incomfortabel y e no tin argumento pa hustifica loke e ta haciendo. E issue no ta kende mag haci peticion y kende mag haya terenonan comercial, e issue ta cu un grupo di famia ta pidi terenonan comercial pa pone tur na benta y esaki ta contra ley y ta algo ilegal.
Fraccion di AVP a confirma durante e reunion aki cu tin speculacion cu tereno tumando lugar y mester pone un paro na esaki. Loke nos kier sa awo ta si fraccion di AVP ta dispuesto pa sostene un mocion presenta pa fraccion di MEP pa laga Algemene Rekenkamer haci un investigacion riba e otorgamento di terenonan comercial bao maneho di Benny Sevinger. Nos ta exigi pa un investigacion tuma luga.
Ta obvio cu un minister asina aki den un estado di derecho cu ta funciona hamas y nunca por keda minister despues di tur e pruebanan cu a wordo presenta. E pruebanan ta papia pa nan mes y inkt y papel no ta gaña. E pruebanan a confirma cu Benny Sevinger ta na altura di e fiesta di bendemento di tereno y e como minister willens en wetens ta duna cooperacion na esaki. No ta 1 caso a wordo presenta sino mas cu 5 caso caminda peticionan ta wordo haci NO pa desaroyonan comercial sino pa pone terenonan na benta. Esnan cu ta traha cu Benny Sevinger a fada di e abusonan aki caminda un famia ta enrikeciendo nan mes cu patrimonio di pueblo y ta e mesun hendenan aki ta duna nos tur pero tur documento pasobra manera e lema di AVP ta bisa, ainda falta. Nos tin suficiente prueba cu a wordo presenta y ta nos deber y obligacion como representante di pueblo pa presenta tur prueba na pueblo y laga pueblo husga Benny Sevinger.