Corupcion, situacion financiero deplorabel, medida, gañamento y asina mi por sigui cu mas cos negativo di e gobierno aki. Na Hulanda nan sa bisa “in het land der blinden is een oog koning” Minister presidente Mike Eman a kere e dicho aki lo conta pa Aruba. Bo por gaña un pueblo, bo por menasa contricantenan politico, persigui pueblo pa nan color politico, pero bo no por para e boluntad di un pueblo. Dia 22 di September Aruba lo tin oportunidad despues di 4 aña pa dicidi rumbo di gobernacion di Aruba. Aruba merece un economia stabil y cu ta crece atrobe, Aruba merece pa biba den siguridad, Aruba merece scolnan renoba y nobo, Pueblo di Aruba mester di un alivio financiero. Nos tur sa cu e belasting na Aruba ta un di esunnan mas halto na mundo, pero ora nos puntra nos mes ta kico ta sosode cu tur e entrada aki den caha di Gobierno, nos ta mira cu prioridadnan ta completamente robes. Biahamento, conferencia, fiesta y nepotismo ta na orden di dia. Nos Tata Todopoderoso a semper duna nos dushi isla e bendicion pa por briya, pero ora gobernantenan lubida e esencia di bida, e importancia di ta honesto y integro nos ta yama e maldad y maldicion riba nos. Mester crea oportunidadnan nobo pa nos hobennan, nos hubentud mester tin e bon ehempel pa por crece den nan bida, mester tin comprension y amor pa otro bek y finalmente mester di un cambio den gobierno. Mi ta convenci cu mañan lo bira miho pa nos tur! Vota Mep, vota Dangui!