Nunca antes den historia di nos pais tabata tin asina tanto crimen registra na Aruba. Na e momentonan aki Aruba a conoce 53 atraco y ‘’high season’’ NO a cuminsa ainda. E no ta percepcion, e no ta high season, e no ta cu criminalinan a bira sabi y tampoco cu media ta fomenta noticia. Esaki ta e realidad na Aruba.
Banda di esaki Aruba ya tin 8 asesinato registra y tin 950 ladronicia di cas registra. Na aña 2015 tabata tin 44 atraco registra y aki ta nota e tendencia cu tin e ultimo añanan aki caminda mas y mas atraco ta tumando lugar. Pa e aña aki so Aruba a conoce un aumento di cantidad di atraco di mas di 20%. Pa prome biaha den historia tin un aña asina aki caminda nos ta wordo azota pa criminalidad.
Nos ta kere cu a yega e momento pa minister Dowers asumi su responsabilidad y reconoce cu Aruba tin un problema serio cu criminalidad. No por ta asina cu un gobernante kier culpa tur otro hende, kier culpa sociedad, kier culpa mayornan, kier culpa Gobierno anterior siendo e mes ta minister di husticia pa ultimo 7 añanan aki. Minister Dowers den su defensa hopi swak y sin argumento a bay asina leu di bisa cu e cantidad di crimennan cu tin actualmente ta wordo cometi pa muchanan cu a nace den gobernacion di MEP. Ora un minister kier defende su maneho cu argumentonan asina ta pasobra simplemente e no tin otro argumento. Loke e mester haci ta cuminsa pa reconoce cu tin un problema y atende cu e problemanan cu tin pa evita cu nos pueblo ta biba den angustia y panico.
Den conseho di minister mes maneho di minister Dowers ta wordo fuertemente cuestiona y hasta critica publicamente. Nos ta boga pa mas siguridad, nos ta boga pa nos pueblo biba den trankilidad. Sin siguridad no tin trankilidad y esaki ta loke ta pasando na Aruba actualmente. Ora wak e presupuesto di KPA (Korps Politie Aruba) pa aña 2017 ta nota cu esaki a keda practicamente mesun cos. Nos ta wak cu minister Dowers a pone solamente 15.000 florin disponibel pa opleiding en cursus di polisnan. Pa un cuerpo asina mester tin hopi mas placa disponibel pa opleiding en cursus. Nos ta lamenta cu no ta tuma siguridad di nos pueblo na serio y no kier acepta cu mester bin accion di inmediato pa alivia e situacion. Loke mas nos ta condena ta e hecho cu minister Dowers kier tapa solo cu un dede. E no kier duna cifranan na parlamento di Aruba y na nos pueblo. E kier sconde informacion pa pueblo. Ora un minister NO kier duna informacion na pueblo ta pasobra tin hopi cos di sconde. Nos ta yegando fin di aña 2016 y ainda nos di Parlamento di Aruba no a haya e jaarverslag di KPA pa aña 2015. Nos a haci minister Dowers un serie di pregunta y ningun el a contesta. No ta keda nada otro di busca e contestanan aki riba caya. Si e no kier respeta Parlamento, si e no kier contesta pregunta di miembronan di Parlamento anto e ora como miembro di Parlamento mester bay caya pa mustra minister cu e debe pueblo splicacion! Ban tur hunto uni pa e marcha contra criminalidad dia 13 October 2016 saliendo for di postkantoor na Playa.