Diamars mainta tabata un dia importante pa Parlamentario Sr. Dangui Oduber, despues di a haci entrega di peticion pa e cambio di kiesverordening. Sr. Oduber ta amplia mas ariba esaki.
Den politica, segun Sr. Oduber, “ bo tin cu bisa loke bo ta haci y bo tin cu haci loke bo ta bisa”. El a bisa di trece cambio den e kiesverordering con e miembro di Parlamento ta wordo eligi y diamars ela cumpli cu esaki. E kier a gradici lider di Fraccion di MEP, Sra. Evelyne Wever- Croes cu a para tras di e iniciativa aki y diamars a entrega e ley di iniciativa.
Na momentonan aki, un miembro di Parlamento ta wordo eligi di diferente manera y esaki ta a base di numeracion ariba lista. Y cu e cambio aki, e deseo di pueblo ta wordo refleha den sala di Parlamento. Despues di eleccion, si e ley aki carga cu aprobacion di mayoria den parlamento esunnan cu saca mas voto lo drenta den Parlamento.
Tambe el a gradici Presidente di Parlamento, Sra. Mervin Wyatt- Ras, pa a ricibi Sr. Oduber den oficina pa haci entrega di e documento aki. Tambe na a personal di Parlamento y tambe e bufete di abogado cu a yud’e traha ariba e ley aki.
Sr. Oduber a sigui bisa cu e ta spera e haya sosten di Presidente di parlamento pa yama e reunion pa trata e ley aki, ora cu haya e ley aki bek for di Raad van Advies. E ta spera cu e por conta cu mayoria den Parlamento pa trece cambio ya cu e pueblo eyfo, kier wak e persona cu nan a vota p’e, representa den sala di parlamento.
E cambio di mas grandi lo ta cu un persona cu saca mas voto, nan ta bin na remarke pa drenta parlamento, y no manera cu e tabata den e ultimo decadanan y no mas via numeracion of secuencia ariba lista.
Presidente di Parlamento Sra. Mervin Wyatt Ras ta splica con e proceso lo bay cuminsa cana di awor aki pa cu e ley di kiesverordening. Sra. Wyatt Ras ta contento cu awo tin miembronan di parlamento ta traha ariba leynan di iniciativa. E ley aki lo mester bay Raad van Advies, pa despues cu e bin bek, e mester cana su caminda, pa e por wordo aproba den un reunion publico.
Depende di con e lihe e ley aki bin bek for di Raad van Advies, depende di e preguntanan y con esaki bay den e reunion publico. Door e ta ley di iniciativa, e ta cana su caminda y parlamento ta dicidi e ora cu ta trata esaki. Y miembronan di parlamento, ora di haci pregunta, nan mester wordo contesta tambe door di e miembro y pa asina e ley wordo aproba den parlamento.